ەلباسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنداعى تاپسىرماعا سايكەس بيىلعى جىلدىڭ 1 اقپانى مەن 18 اقپان ارالىعىندا ەلىمىزدىڭ بارلىق ايماقتارىنداعى اۋىل تۇرعىندارىنا اۋىل شارۋاشىلىعى كووپەراتيۆتەرىن قۇرۋ جانە كووپەراتسيالاردى مەملەكەتتىك قولداۋدىڭ جاڭا مەحانيزمدەرى بويىنشا ءتۇسىندىرۋ جۇمىستارى جۇرگىزىلەدى, دەپ حابارلادى ۆەدومستۆونىڭ ءباسپاسوز قىزمەتى.
مەملەكەت باسشىسى قر اۋىل شارۋاشىلىعى مينيسترلىگى الدىنا اۋىل ازاماتتارىن اۋىل شارۋاشىلىعى كووپەراتسيالارىن كەڭ اۋقىمدا قۇرۋعا ىنتالاندىرۋ جانە جەرگىلىكتى تۇرعىنداردى جۇمىسپەن قامتۋدا 500 مىڭ جقش الەۋەتىن پايدالانۋ بويىنشا مىندەتتەر قويىپ وتىر.
اتالعان ءتۇسىندىرۋ جۇمىستارىن جوعارى دەڭگەيدە ورىنداۋ ءۇشىن مينيسترلىك تاراپىنان اشم قىزمەتكەرلەرى مەن عىلىمي ۇيىمدار وكىلدەرىنەن قۇرىلعان ساراپشىلار توبى قۇرىلدى.
مۇنداعى باستى مىندەت – ءاربىر اۋىل ازاماتىن اۋىل شارۋاشىلىعى كووپەراتسيالارى نەگىزدەرى بويىنشا اقپاراتتاندىرىپ, ناقتى ىسكە جۇمىلۋىنا ىنتالاندىرۋ.
بۇدان بولەك, جەر جەرلەردە جۇرگىزىلەتىن ساپارلى ءتۇسىندىرۋ جۇمىستارى بارىسىندا بۇعان دەيىن قۇرىلعان كووپەراتيۆتەردىڭ مونيتورينگى جۇرگىزىلەدى. ياعني, ءتيىستى ينفراقۇرىلىمىنىڭ بارلىعى مەن قايتا وڭدەۋشى كاسىپورىندارمەن ءوزارا بايلانىسى, وتكىزۋ نارىعى مەن وزگە دە ماسەلەلەرى ساراپتالادى.