جەتى ۇستاز

ۇزدىك وقىتۋشى اتاندى الماتىداعى قازاق مەملەكەتتىك قىز­دار پەداگوگيكالىق ۋنيۆەرسيتەتى – تمد ەلدەرى اراسىندا تەك ارۋلارعا ارنالعان بىردەن-ءبىر جوعارى وقۋ ورنى. قارا شاڭىراقتا قازىرگى تاڭدا 8500-گە جۋىق ستۋدەنت ءبىلىم الۋدا. قىزدار ۋنيۆەرسيتەتى ءۇشىن جىل جاقسى باستالدى. ءبىلىم وشاعىنىڭ جەتى بىردەي ۇستازى ءبىلىم جانە عىلىم مينيس­ترلىگىنىڭ «جوعارى وقۋ ورنىنىڭ ۇزدىك وقىتۋشىسى» اتاندى. ولار – قازاق فيلولوگياسى جانە الەم تىلدەرى فاكۋلتەتىنىڭ ۇستازى, پروفەسسور ءلاززات ادىلبەكوۆا, فيزيكا-ماتەماتيكا فاكۋلتەتىنىڭ  پروفەسسورى اجىمۇقان جامالوۆ, قازاق فيلولوگياسى جانە الەم تىلدەرى فاكۋلتەتىنىڭ قاۋىم­داس­تىرىلعان پروفەسسورى ساعيرا ودانوۆا, فيزيكا-ماتەماتيكا فاكۋلتەتىنىڭ پروفەسسورى ەلميرا باكيروۆا, الەۋمەتتىك-گۋمانيتارلىق فا­كۋلتەتىنىڭ قاۋىمداستىرىلعان پروفەس­سورى سارا قىرىقباەۆا, ونەر جانە ءما­دەنيەت فاكۋل­تەتىنىڭ پروفەسسورى ءمول­دىر ورازاليەۆا, پەداگوگيكا جانە پسيحولوگيا فاكۋلتەتىنىڭ پروفەسسورى گۇلنار مۇراتباەۆا. ۇستازدار جەتىستىگىمەن قا­تار, جىلدان-جىلعا ۋنيۆەر­سيتەتتىڭ دە تابىستارى ەسەلەنۋدە. 2015 جىلى قىزدار ۋنيۆەرسيتەتى ۇلتتىق بيزنەس رەيتينگتىڭ حالىقارالىق رەيتينگ وداعىنىڭ شەشىمىمەن «سالا كوشباسشىسى-2015» سەرتي­فيكاتىمەن جانە «سالا كوشباسشىسى-2015» قابىرعا مەدالىمەن ماراپاتتالسا, وتكەن جىلى QS Stars University Ratings حالىقارالىق رەيتينگى بويىنشا «3 جۇلدىز» يەلەنگەن تۇڭعىش پەداگوگيكالىق جوعارى وقۋ ورنى اتاندى. ال ءبىلىم وشاعىنىڭ رەكتورى دينار نوكەتاەۆا جاڭا جىل قارساڭىندا رەسپۋبليكا رۋحانياتى مەن بىلىكتىلىك الەۋەتىن كوتەرۋدەگى قىزمەتى ءۇشىن «پاراسات» وردەنىمەن ماراپاتتالدى. قازىرگى تاڭدا قازاق مەملە­كەتتىك قىزدار پەداگو­گيكالىق ۋنيۆەرسيتەتى – ۇلتتىق رەيتينگ بويىنشا پەداگوگيكالىق جوو-لار ىشىندە العاشقى ورىنداردى يەلەنگەن ەڭ ۇزدىك ۋنيۆەرسيتەت بولىپ تابىلادى. ەۋروپالىق ءبىلىم بەرۋ جۇيەسىنە قاراي بوي تۇزەگەن ۋنيۆەرسيتەتتە ءۇش دەڭگەيلى ماماندار دايىنداۋ جۇيەسى تولىعىمەن ەنگىزىلگەن. بۇگىندە ۋنيۆەرسيتەت قوس ديپ­لومدى باعدارلامالار بويىنشا ءبىلىم الۋعا قول جەتكىزىپ, LAMS ( ۇلىبريتانيا) جانە ميسسيسيپي (اقش) اتتى الەمدىك ۋنيۆەرسيتەتتەرمەن ارنايى باعدارلامانى جۇزەگە اسىرۋدا. ايناش ەسالي, «ەگەمەن قازاقستان» الماتى