«قايرات» فۋتبول كلۋبى حورۆاتيالىق جارتىلاي قورعاۋشى يۆو يليچەۆيچپەن تولىقتى, دەپ حابارلايدى vesti.kz.
30 جاستاعى فۋتبولشىمەن اراداعى كەلىسىمشارت مەرزىمى 2+1 ۇلگىسى بويىنشا جاسالدى.
حورۆاتيالىق ويىنشى سوڭعى ماۋسىمدى رەسەيدىڭ «انجي» كومانداسىندا وتكىزگەن. رەسەي بىرىنشىلىگىنىڭ العاشقى اينالىمىندا 14 كەزدەسۋگە قاتىسىپ, 2 گولدىڭ جانە 1 ناتيجەلى پاستىڭ اۆتورى اتانعان.
يۆو يليچەۆيچ گەرمانيادا تۋىپ-وسكەنىمەن 2010-2013 جىلدار ارالىعىندا حورۆاتيا ۇلتتىق قۇراماسىنىڭ نامىسىن قورعادى. 2012 جىلى وتكەن ەۋروپا چەمپيوناتىنا جاراقات العانىنا بايلانىستى قاتىسا الماعان.
ايتا كەتەيىك, «قايراتتىڭ» جاڭا ويىنشىسى رەسەي چەمپيوناتىنا اۋىسپاي تۇرىپ, نەمىستىڭ «گامبۋرگ», «بوحۋم», «گرويتەر فيۋرت», «كايزەرسلاۋتەرن» جانە «دارمشتاتد» كوماندالارىندا دوپ تەپكەن. جالپى العاندا بۋندەسليگادا 134 مارتە الاڭعا شىعىپ, 18 رەت گول سوققان.