بۇگىن قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ جانە ولاردىڭ سەنىم بىلدىرىلگەن ادامدارىنىڭ, سونداي-اق وزگە دە ازاماتتاردىڭ ۇگىت جۇمىستارىن جۇرگىزۋىنە بولمايدى, تىيىم سالىنعان. وسىعان بايلانىستى كەشە ورتالىق سايلاۋ كوميسسياسىنىڭ حاتشىسى باقىت مەلدەشوۆ باق وكىلدەرىن سايلاۋالدى ۇگىت شارالارىنىڭ قالاي وتكەنىنەن حاباردار ەتتى.
وسك حاتشىسىنىڭ ايتۋىنشا, پرەزيدەنتتىككە كانديداتتاردىڭ سايلاۋالدى ۇگىت ناۋقانى زاڭ بۇزۋشىلىقسىز ءوتتى دەۋگە بولادى. ناۋقان بارىسىندا ءبىرشاما كەمشىلىكتەر دە كەزدەسكەن. ولار نەگىزىنەن كەيبىر كانديداتتاردىڭ بيلبوردتارى مەن سىرتقى جارنامالارىنىڭ مەرزىمىنەن كەشىكتىرىلىپ ورنالاستىرىلۋىنا بايلانىستى. دەگەنمەن, اتالعان كەمشىلىكتەر شۇعىل تۇردە شەشىلىپ, قالپىنا كەلتىرىلىپتى.
– سوندىقتان ۇگىت ناۋقانى بارىسىندا ايتارلىقتاي زاڭ بۇزۋشىلىقتار بولدى دەپ ايتا المايمىز, – دەدى باقىت مەلدەشوۆ وسى جونىندە. – كانديداتتاردىڭ ۇگىت جۇمىستارى بۇگىن (1 ءساۋىر) ساعات 24.00-دە اياقتالادى. ىلىنگەن بيلبوردتار, پلاكاتتار مەن پاراقشالار الىنبايدى, سول ورىندارىندا قالادى.
ورتالىق سايلاۋ كوميسسياسىنىڭ حاتشىسى ءسوز بارىسىندا داۋىس بەرۋگە كەلگەن سايلاۋشىلارعا اۋماقتىق سايلاۋ كوميسسيالارى تاراپىنان ىنتالاندىرۋ سىيلىقتارى بەرىلۋى مۇمكىن ەكەندىگىن دە ايتىپ قالدى. سىيلىقتار سايلاۋ ۋچاسكەسىنە العاشقىلاردىڭ ءبىرى بولىپ كەلگەن نەمەسە سايلاۋعا العاش رەت داۋىس بەرگەن سايلاۋشىلارعا بەرىلەتىن سياقتى.
– بۇل – قولداۋعا تۇراتىن شارا. سىيلىقتىڭ قانداي جانە قانشالىقتى مولشەردە بولاتىنى جەرگىلىكتى اتقارۋشى ورگانداردىڭ مۇمكىندىكتەرىنە بايلانىستى, – دەدى ول. – بىراق ولارعا ەشقانداي دا نۇسقاۋ بەرىلگەن جوق. ەستۋىمىزشە, سىي-سياپات ۇيىمداستىرۋدى قولعا الىپ جاتقان سايلاۋ ۋچاسكەلەرى دە بار.
ءاليسۇلتان قۇلانباي.