باس پروكۋراتۋرانىڭ جانىنداعى قۇقىق قورعاۋ ورگاندارىنىڭ اكادەمياسىندا قۇقىق قورعاۋ ورگاندارى باسشىلىعىنىڭ پرەزيدەنتتىك رەزەرۆىندە تۇرعان قىزمەتكەرلەردىڭ كاسىبي دەڭگەيىن ارتتىرۋدىڭ كەزەكتى كۋرستارىنىڭ اشىلۋى ءوتتى, دەپ حابارلادى ۆەدومستۆونىڭ ءباسپاسوز قىزمەتى.
«بۇل كۋرستارعا تىڭداۋشىلار رەتىندە پروكۋراتۋرا مەن ىشكى ىستەر ورگاندارىنىڭ ورتالىق اپپاراتى مەن وبلىستىق بولىمشەلەرىندە باسشىلىق لاۋازىمداعى قىزمەتكەرلەرى قاتىسادى. وقىتۋدىڭ نەگىزگى ماقستاتى – تىڭداۋشىلاردىڭ باسشىلىق قىزمەتكە تاعايىندالۋى ءۇشىن قاجەتتى كاسىبي داعدىلارى مەن باسقارۋ قۇزىرەتىن جەتىلدىرۋ», - دەلىنگەن حابارلامادا.
اكادەميا رەكتورى ۇلان بايجانوۆ ءىس-شارانى اشا وتىرىپ, رەزەرۆيستەردى بولاشاقتا بۇدان دا جاۋاپتى باسشىلىق قىزمەتكە دايارلاۋدا وقىتۋ كۋرستارىنىڭ ماڭىزدىلىعى مەن پراكتيكالىق پايدالىلىعىن اتاپ ءوتتى.
ۇ.بايجانوۆ ايتىپ وتكەندەي, مەملەكەت باسشىسى قوعام تالاپتارى مەن جوعارى حالىقارالىق ستاندارتتارعا جاۋاپ بەرەتىن قۇقىق قورعاۋ جۇيەسىن قۇرۋ مىندەتىن العا قويدى. بۇل ءۇشىن ەلىمىزگە جاڭا فورماتسيانىڭ باسشىلارى, ياعني, ءبىلىمدى, ادامگەرشىلىك قاسيەتتەرى جوعارى ءارى ادامداردىڭ سەنىمىنەن شىعاتىن باسشىلار قاجەت. ءوز كەزەگىندە اكادەميا پرەزيدەنتتىك رەزەرۆتە تۇرعان كادرلاردى ارنايى دايارلاۋدىڭ جۇيەسىن جۇزەگە اسىرىپ جاتىر. وتكەن جىلى پرەزيدەنتتىك رەزەرۆتى دايارلاۋ كۋرستارىنان پوكۋراتۋرا, ىشكى ىستەر ورگاندارى, ەكونوميكالىق تەرگەپ-تەكسەرۋ جانە سىبايلاس جەمقورلىققا قارسى كۇرەس قىزمەتتەرىنىڭ 45 قىزمەتكەرى ءوتتى, ولاردىڭ 9-ى باسشىلىق قىزمەتكە تاعايىندالدى, - دەپ اتاپ ءوتتى رەكتور.
وقىتۋدى جوعارعى دەڭگەيدە وتكىزۋ ءۇشىن الدىڭعى كۋرستاردى ۇيىمداستىرۋ كەزىندە الىنعان تاجىريبەنى ەسكەرە وتىرىپ, ارنايى وقۋ باعدارلاماسى ازىرلەندى. العاش رەت وقۋ پروتسەسىنە باسشىلىق قىزمەتتەگى اناليتيكالىق جۇمىس نەگىزدەرى بويىنشا جاڭا مودۋل ەنگىزىلدى. ول قىزمەت بابىنداعى مىندەتتەردى شەشۋ كەزىندە اناليتيكالىق قابىلەتتى جەتىلدىرۋگە باعىتتالعان. سونداي-اق باس پروكۋوردىڭ تاپسىرماسىن ورىنداۋ اياسىندا باسقارۋدىڭ ترانسفورماتسياسى ماسەلەلەرى بويىنشا ترەنينگتەر ەنگىزىلدى (Change programme).
جالپى العاندا وقىتۋ پروتسەسى قالىپتى جانە كريزيستىك جاعدايلاردا ۇجىمدى ءتيىمدى باسقارۋدىڭ (HR-مەنەدجمەنت) كاسىبي داعدىلارىن دامىتۋعا جانە جەتىلدىرۋگە باعىتتالعان. سونىمەن قاتار كۋرس تاقىرىبى ستراتەگيالىق ءارى مەملەكەتىمىز ءۇشىن وزەكتى ۇلتتىق قاۋىپسىزدىكتى قامتاماسىز ەتۋ, تەرروريزم جانە ەكسترەميزمگە, سىبايلاس جەمقورلىققا قارسى كۇرەس ماسەلەلەرىنە ارنالعان.
جوسپار بويىنشا كۋرس ۇزاقتىعى ءبىر ايعا سوزىلادى جانە ول 145 اكادەميالىق ساعاتتى قۇرايدى. ولاردىڭ نەگىزگى بولىگى كەيستىك تاپسىرمالاردى شەشۋگە جانە قۇقىق قورعاۋ قىزمەتىنە مەيلىنشە جاقىنداتىلعان جوبالاردى جاساۋعا ارنالاتىن بولادى.
جينالعانداردى كۋرس باعدارلاماسىنىڭ ەرەكشەلىكتەرىمەن تانىستىرىپ ءوتىپ, ۇلان بايجانوۆ بارلىق تىڭداۋشىلاردى ناتيجەلى جۇمىس جاساۋعا شاقىردى.
وقىتۋ كۋرستارىن ۇيىمداستىرۋعا ەۋروپالىق وداقتىڭ "قازاقستانداعى قىلمىستىق سوت تورەلىگىن جەتىلدىرۋ" جوباسىنىڭ قاتىسۋشىلارى, مەملەكەتتىك ورگاندار مەن ەلىمىزدىڭ جەتەكشى عىلىمي-ءبىلىم بەرۋشى مەكەمەلەرى بەلسەندى كومەك كورسەتۋدە.