كەشە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ پولشادان كەلگەن بايقاۋشىلار – «پولشا-شىعىس» ىنتىماقتاستىعى قاۋىمداستىعىنىڭ ۆيتسە-توراعاسى يوزەف برىللمەن جانە ۆارشاۆا ۋنيۆەرسيتەتىنىڭ پروفەسسورى اندجەي ۆەرجبيتسكيمەن كەزدەستى.
وسك باسشىسى ولاردى سايلاۋعا ازىرلىك بارىسىنان حاباردار ەتتى. پولياك بايقاۋشىلارى ءوز كەزەگىندە قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىن بايقاۋعا بەرىلگەن ءمۇمكىندىك ءۇشىن ريزاشىلىقتارىن ءبىلدىردى جانە رەسپۋبليكا استاناسىنىڭ وزدەرى بولعان جەكەلەگەن سايلاۋ ۋچاسكەلەرىنەن العان اسەرلەرىمەن ءبولىستى. «ءبىز استانا قالاسىنىڭ ەكى سايلاۋ ۋچاسكەسىندە بولدىق. كوميسسيا مۇشەلەرى سايلاۋدى ازىرلەۋدىڭ بارلىق ماسەلەلەرىنە ۇلكەن جاۋاپكەرشىلىكپەن جانە كاسىبي تۇرعىدان قارايتىنىن كوردىك. دەموكراتيالىق ءراسىمدەر ساقتالعان. ۋچاسكەلەر داۋىس بەرۋ بارىسىن ەش كەدەرگىسىز بايقاۋ ءۇشىن تولىق مۇمكىندىك جاساۋدى ەسكەرە وتىرىپ جابدىقتالعان. ۋچاسكەلەردىڭ دايىندىعى بىزگە جاقسى اسەر قالدىردى», – دەپ اتاپ ءوتتى يوزەف برىلل.
* * *
سونداي-اق كەشە ورتالىق سايلاۋ كوميسسياسى توراعاسىنىڭ ورىنباسارى ۆ.فووس رەسەي فەدەراتسياسى ورتالىق سايلاۋ كوميسسياسى ءتوراعاسىنىڭ ورىنباسارى س.ۆاۆيلوۆپەن كەزدەستى.
دەلەگاتسيا مۇشەلەرى كەزەكتەن تىس پرەزيدەنتتىك سايلاۋدى ازىرلەۋ جانە وتكىزۋ بارىسىمەن جان-جاقتى تانىسۋعا, سونداي-اق سايلاۋ زاڭناماسىنىڭ كانديداتتاردى ۇسىنۋ مەن تىركەۋ ءتارتىبىن, كانديداتتاردىڭ سايلاۋالدى ۇگىتىن قارجىلاندىرۋدى رەتتەيتىن جەكەلەگەن ەرەجەلەرىنە قىزىعۋشىلىق تانىتتى. ال ۆلاديمير فووس ورتالىق سايلاۋ كوميسسياسىنىڭ كەزەكتەن تىس پرەزيدەنتتىك سايلاۋىن ازىرلەۋ مەن وتكىزۋ جونىندەگى جۇمىسىمەن, سايلاۋ ناۋقانىنىڭ نەگىزگى كەزەڭدەرىمەن تانىستىرىپ, ولاردىڭ بىرقاتار سۇراقتارعا جاۋاپ قايتاردى.
– ءبىز استانا قالاسىنىڭ اۋماقتىق سايلاۋ كوميسسياسىندا بولدىق. ءۇلكەن جۇمىس اتقارىلعان. وسىنداي ماڭىزدى سايلاۋدى ەل كونستيتۋتسياسى مەن سايلاۋ زاڭناماسىنا سايكەس وتكىزۋ ءۇشىن بارلىق جاعداي جاسالعان, – دەدى رەسەي فەدەراتسياسى ورتالىق سايلاۋ كوميسسياسى توراعاسىنىڭ ورىنباسارى.
ءاليسۇلتان قۇلانباي.