پارلامەنت سەناتىنىڭ توراعاسى قاسىم-جومارت توقاەۆ پالاتا بيۋروسىنىڭ مۇشەلەرىمەن جۇمىس بابىنداعى كەڭەس وتكىزدى, دەپ حابارلادى سەناتتىڭ ءباسپاسوز قىزمەتى.
سەنات باسشىسى پرەزيدەنت, ۇكىمەت جانە پارلامەنت اراسىنداعى وكىلەتتىكتەردى قايتا ءبولۋ ماقساتىنداعى ەلىمىزدىڭ اتا زاڭى – كونستيتۋتسياعا ەنگىزىلەتىن تۇزەتۋلەردى تۇسىندىرۋگە ارنالعان دەپۋتاتتاردىڭ 2-10 اقپانداعى ايماقتارعا ساپارىنا باسا نازار اۋداردى.
«پرەزيدەنتتىڭ باستاماسى جۇرتشىلىق اراسىندا كەڭىنەن قولداۋ تاپتى. ۇسىنىلعان تۇزەتۋلەردى حالىقپەن تالقىلاۋ, ەنگىزىلەتىن وزگەرىستەردىڭ ءمانى مەن ماعىناسىن ءتۇسىندىرۋ دەپۋتاتتاردىڭ مىندەتى», - دەدى ق.توقاەۆ.