وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ساۋد ارابياسى كورولدىگىنىڭ - شەيحى, «اL Ramez Group» كومپانياسىنىڭ پرەزيدەنتى ابدۋللا زايد ءال-مەلەيحيمەن كەزدەستى. جيىن بارىسىندا بىرلەسكەن ينۆەستيتسيالىق جوبالاردى جۇزەگە اسىرۋدا ەكى جاقتىڭ وكىلەتتىگى مەن مىندەتتەرىن تالقىلاۋمەن كونسترۋكتيۆتى ديالوگ وتكىزىلدى. بۇل تۋرالى وقو اكىمدىگىنىڭ ءباسپاسوز قىزمەتى حابارلادى.
اڭگىمە بارىسىندا تاراپتار وڭتۇستىك قازاقستان مەن ساۋد ارابياسىنىڭ ءوزارا قارىم-قاتىناسىن جاڭا دەڭگەيگە كوتەرۋ قاجەتتىگىن اتاپ ءوتتى.
«ءبىز ەكونوميكانى ارتاراپتاندىرۋعا باعىتتالعان رەفورمالاردى ىسكە اسىرۋدامىز. وڭتۇستىك قازاقستان وبلىسى - رەسپۋبليكاداعى ونەركاسىپ پەن اۋىل شارۋاشىلىعىنىڭ بارلىق سالالارى دامىعان ءوڭىر. كاسىپكەرلىكتى قولداۋ ءۇشىن بيزنەسكە بارىنشا جەڭىلدىكتەر قاراستىرىپ, ينۆەستيتسيا تارتۋ ءۇشىن قولايلى جاعدايلار جاسالۋدا. بيزنەس ءۇشىن اكىمشىلىك كەدەرگىلەر مەيلىنشە ازايتىلدى. قازىر بىزدە 3 ارنايى ەكونوميكالىق ايماق قۇرىلىپ, وندا ليبەرالدى سالىق رەجىمى قولدانىلا وتىرىپ جۇمىس جۇرگىزىلۋدە», - دەدى ايماق باسشىسى جانسەيىت تۇيمەباەۆ.
ءوز كەزەگىندە شەيح- ابدۋللا زايد ءال-مەلەيحي قازاقستان مەن ساۋد ارابياسى اراسىنداعى ىسكەرلىك بايلانىستاردىڭ كەلەشەگى زور ەكەنىنە نازار اۋداردى. ونىڭ ايتۋىنشا, مۇندا جۇمىس ىستەۋگە, ساۋدا-ساتتىق جاساۋعا جاقسى جاعداي جاسالعان. اسىرەسە, قازاقستاننىڭ ساياسي تۇراقتىلىعى, ىشكى تاتۋلىعى ينۆەستورلار ءۇشىن ەركىن جۇمىس ىستەۋگە مۇمكىندىك بەرەدى. بۇدان بولەك, ساۋديالىق ءىرى كومپانيا باسشىسى وڭتۇستىك قازاقستاننىڭ بۇگىنگى تىنىس-تىرشىلىگىمەن تولىقتاي تانىسىپ, تۇلكىباس اۋدانىنان جىلىنا 30 مىڭ توننا ەت بەرەتىن قۇس فابريكاسىنىڭ قۇرىلىسىن بيىلعى ناۋرىز ايىندا باستايتىندارىن جەتكىزدى.
جالپى قۇنى 85 ملن ەۋرونى قۇرايتىن جوبا ەكى كەزەڭ بويىنشا جۇزەگە اسىرىلادى. العاشقىسىنا 61 ملن ەۋرو جوسپارلانسا, ەكىنشى كەزەڭ ءۇشىن 24 ملن ەۋرو قاراستىرىلىپتى. جوبانى جۇزەگە اسىرۋ بارىسىندا بالاپان اسىراۋ ورىندارى, انالىق جانە بالاپان ءوسىرۋ ورىندارى سالىندى. بۇدان بولەك ينكۋباتور, برويلەرلىك كورپۋس, سويۋ تسەحى جانە جەم-ءشوپ زاۋىتى بوي كوتەردى.