وسكەمەن قالالىق توتەنشە جاعدايلار قىزمەتىنىڭ ماماندارى ەرەكشە رەيد ۇيىمداستىردى. ەرەكشەلىگى سول, ءورت قاۋىپسىزدىگىن دۇرىس ساقتامايتىن تۇرعىنداردىڭ ۇيىنە وزدەرىمەن بىرگە جىل يەسى - قورازدى ەرتىپ باردى. قوراز كيىمىن كيگەن ءورت ءسوندىرۋ ءبولىمىنىڭ مامانى ارىپتەستەرىمەن بىرگە ءۇي يەسىنە ءورت قاۋىپسىزدىگى ەرەجەلەرىن ءتۇسىندىرىپ, نۇسقاۋلىقتاردى تابىس ەتتى.
-مۇنداي شارانى بەكەردەن بەكەر قولعا الىپ وتىرعانىمىز جوق. ءورتتىڭ سالدارىنان ومىرىمەن قوش ايتىسىپ جاتقان تۇرعىندار از ەمەس. ءيىس گازىنان ۋلاناتىن ادامداردىڭ سانى دا كوپ. 2017 جىلدىڭ باسىنان بەرى وسكەمەندە ءورت كەزىندە 3 ادام قايتىس بولدى. تۇرعىن ۇيلەردى ارنايى ارالاپ, نۇسقاۋلىقتاردى تاراتىپ, ءتۇسىندىرۋ جۇمىستارىن بارىنشا جۇرگىزىپ جاتقانىمىزبەن ءورت قاۋىپسىزدىگىن ساقتامايتىن تۇرعىندار سانى ازايماي وتىر. مۇنداي سەلقوستىقتىڭ سوڭى قايعىلى جاعدايلارعا اكەلىپ سوقتىرۋى مۇمكىن, - دەيدى وسكەمەن قالالىق توتەنشە جاعدايلار قىزمەتىنىڭ ءباسپاسوز حاتشىسى مارينا ليسكوۆا.
ازامات قاسىم, «ەگەمەن قازاقستان».
وسكەمەن