ۋنيۆەرسيادا ويىندارى اياقتالعاننان كەيىن اتلەتيكالىق اۋىلدا وليمپياداعا دايىندىق ورتالىعى, بيۋدجەتتىك سۋپەرماركەتتەر جەلىسى ورنالاسادى. بۇل تۋرالى قالا اكىمى باۋىرجان بايبەكتىڭ ورتالىققا ساپارىنان كەيىن بەلگىلى بولدى, دەپ حابارلايدى abctv.kz.
بۇدان بولەك, 43 ورىندىق ستۋدەنتتەر قوناق ءۇيى, 1,5 مىڭ ادامعا ارنالعان الاتاۋ اۋدانىنىڭ حالىققا قىزمەت كورسەتۋ ورتالىعى, قازپوشتا ورتالىعى اشىلادى.
سونداي-اق, «قازاقستاننىڭ يپوتەكالىق كومپانياسى » اق ارقىلى اۋىلداعى 1748 پاتەردى ساتۋ تۋرالى شەشىم قابىلدانعان. بۇل ايماقتاردى دامىتۋ-2020 باعدارلاماسى بويىنشا جۇزەگە اسىرىلادى. پاتەرلەر «1 شارشى مەتردى 1120 تەڭگەمەن 20 جىلدا ساتۋ قۇقىعى بويىنشا جالعا الۋ» شارتىمەن بەرىلەدى.
باعدارلاماعا كوپبالالى وتباسىلار, تولىق ەمەس وتباسىلار, مۇمكىندىگى شەكتەۋلى بالالاردى اسىراپ وتىرعاندار, ورالماندار, 1-2 توپتاعى مۇگەدەكتەر, مەملەكەتتىك جانە اسكەري قىزمەتكەرلەر, مەملەكەتتىك ورگانداردىڭ جانە بيۋدجەتتىك ۇيىمداردىڭ قىزمەتكەرلەرى قاتىسا الادى.
سونداي-اق, اتلەتتەردىڭ بولمەلەرىنە ساتىپ الىنعان جيھازدار مەن تۇرمىستىق تەحنيكالار قالاداعى اۋرۋحانالارعا, ەمحانالارعا, بالاباقشالارعا تاراتىلىپ بەرىلەدى.