فرانتسيانىڭ كۋرورتتى شاھارى البيەزدەن جاعىمدى جاڭالىق جەتتى التايعا. ون بەس جاستاعى ءوسكەمەندىك بويجەتكەن اياۋلىم امىرەنوۆا فريستايلدىڭ موگۋل تۇرىنەن وتكەن ەۋروپا كۋبوگىنىڭ ءبىرىنشى كەزەڭىندە 3-ءشى, جۇپتاسىپ ونەر كورسەتۋدەن سايىسقا تۇسكەن ەكىنشى كەزەڭدە 2-ورىندى يەلەندى. قازىر ەكى كەزەڭ بويىنشا ءساتتى سىرعاناعان قازاق قىزى رەيتينگتە كوش باستاپ, ۇزدىكتەرگە بەرىلەتىن سارى جەيدەنى كيىپتى.
- بۇل – اياۋلىمنىڭ سپورتتاعى العاشقى ۇلكەن جەتىستىگى. قۋانىشتان جۇرەگىمىز جارىلارداي بولىپ تۇر. ارينە, ەل ىشىندەگى جارىستاردا توپ جارىپ جۇرگەنىمەن, شەت ەلدە وتەتىن ۇلكەن ءدۇبىرلى دودالاردا جۇلدەگە ءىلىنۋ وڭاي شارۋا ەمەس. بۇعان دەيىن قىزىمىز ەكى-ءۇش مارتە ەۋروپا كۋبوگىنا قاتىسىپ, بىردە 10, بىردە 8-ورىنداردى يەلەنىپ ءجۇردى. ەڭ جوعارعى جەتىستىگى - 6-ورىن. بۇل جولعى جارىستىڭ ءبىرىنشى كەزەڭىندە 1-ورىندى نورۆەگيا, 2-ورىندى بريتانيا سپورتشىلارى العان ەكەن. ون التى مەملەكەتتەن قاتىسقان جيىرما ءتورت قىزدىڭ ىشىنەن 3-ورىننان كورىنۋ ۇلكەن جەتىستىك دەپ ويلايمىن. بولاشاعى ءالى الدا عوي, - دەيدى اناسى گاۋحاريا سابيلدينا.
كارى قۇرلىقتا وتكەن ءدۇبىرلى دوداعا وسكەمەننەن اياۋلىممەن بىرگە ەكى سپورتشى قاتىسقان كورىنەدى. 18 جاستاعى ولەگ تسينن ءبىرىنشى كەزەڭدە 6-ورىنعا تابان تىرەپتى.
ەلىمىزدىڭ بىرنەشە دۇركىن چەمپيونى, جاستار اراسىنداعى سپارتاكيادانىڭ جەڭىمپازى اتانعان وسكەمەندىك بويجەتكەن قازىرگى ۋاقىتتا اقپان ايىندا جاپونيانىڭ ساپپورو قالاسىندا وتەتىن ازيادا ويىندارىنا قاتىسۋعا ازىرلەنىپ جاتقان كورىنەدى. ءبىر ايتا كەتەرلىگى, بۇل سايىستا فريستايلدىڭ موگۋل تۇرىنەن قازاق قىزدارى اراسىنان جالعىز اياۋلىم عانا ەل نامىسىن قورعايتىن بولادى.
ينتەرنەتتىڭ زامانى عوي قازىر. اياۋلىممەن تەلەفون ارقىلى تىلدەسە الماساق تا, اتا-اناسىنىڭ رۇقساتىمەن whatsapp جەلىسى ارقىلى سويلەسۋدىڭ ءساتى ءتۇستى.
«جارىس قالايشا ءوتتى؟ كوڭىل-كۇيىڭ قالاي؟» دەگەن ساۋالىمىزعا: «جارىس قيىن دا, وڭاي دا بولعان جوق. باسىندا قاتتى ۋايىمداپ ەدىم. 3-ورىن العانىمدى ەستىگەندە سەنەر-سەنبەسىمدى بىلمەدىم. ەكىنشى كەزەڭ دە مەن ءۇشىن ءساتتى بولدى. وتە قۋانىشتىمىن» دەپ جاۋاپ جازىپتى اياۋلىم.
ازامات قاسىم, «ەگەمەن قازاقستان»
وسكەمەن