ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ بيۋرو وتىرىسى ءوتتى. وندا الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
ول بويىنشا ءماجىلىس دەپۋتاتتارى «جوعارى سوت كەڭەسى تۋرالى» زاڭعا وزگەرىستەر ەنگىزۋگە قاتىستى زاڭ جوباسىن ءبىرىنشى وقىلىمدا قارايدى دەپ كۇتىلۋدە.
سونىمەن بىرگە, ەلىمىزدىڭ كەيبىر كونستيتۋتسيالىق زاڭدارىنا وزگەرىستەر ەنگىزۋ تۋرالى زاڭ جوباسى دا وسى كۇنى حالىق قالاۋلىلارىنىڭ تالقىسىنا ۇسىنىلماق.
جالپى وتىرىستا حالىقارالىق جەكە قۇقىق جونىندەگى گااگا كونفەرەنتسياسىنىڭ جارعىسىن راتيفيكاتسيالاۋ بويىنشا زاڭ جوباسى جۇمىسقا قابىلداناتىن بولادى.
بيۋرو وتىرىسىندا ءوڭتۇستىك قازاقستان وبلىسىندا پارلامەنتتىك تىڭداۋدى دايىنداۋ ءجونىندەگى ارناۋلى ۋاقىتشا كوميسسيانىڭ كوشپەلى وتىرىسىن وتكىزۋ جانە دەپۋتاتتاردىڭ سايلاۋشىلارمەن كەزدەسۋلەرى ءۇشىن وڭىرلەرگە ساپارعا شىعۋى تۋرالى قاۋلى قابىلداندى.