الماتىدا ءوتىپ جاتقان XXVIII قىسقى ۋنيۆەرسيادا سپورت سايىستارىنا ارنالعان ءدۇبىرلى دودا عانا ەمەس, قازاقتىڭ ۇلتتىق ءداستۇرىن, مادەنيەتىن شەتەلدىكتەرگە جان-جاقتى تانىستىراتىن ۇلكەن مۇمكىندىك. الەمنىڭ تۇكپىر-تۇكپىرىنەن كەلگەن تۋريستەر دومبىرانىڭ قوڭىر ۇنىنە قۇلاق ءتۇرىپ, كۇي قۇدىرەتىنە قول سوعاتىن بولادى.
شەتەلدىك قوناقتارعا ۇلتتىق ونەردى, ءتول ءمادەنيەتىمىزدى ناسيحاتتاۋ ماقساتىندا جامبىل اتىنداعى قازاق مەملەكەتتىك فيلارمونياسى بىرقاتار ءمادەني ءىس-شارالاردى ۇيىمداستىرۋدى جوسپارلاپ وتىر. ياعني 31 قاڭتار كۇنى قازاقستان رەسپۋبليكاسى مەملەكەتتىك ءۇرمەلى اسپاپتار وركەسترىنىڭ «ۋنيۆەرسيادا-2017» – شىڭعا باستايتىن جول!» اتتى كونتسەرتى وتەدى. كوركەمدىك جەتەكشىسى جانە باس ديريجەرى قازاقستاننىڭ ەڭبەك سىڭىرگەن قايراتكەرى قانات احمەتوۆ, ديريجەرى – قازاقستاننىڭ ەڭبەك سىڭىرگەن قايراتكەرى الەكساندر بەلياكوۆ.
ال 3 اقپان كۇنى كوركەمدىك جەتەكشىسى جانە باس ديريجەرى – قازاقستاننىڭ ەڭبەك سىڭىرگەن قايراتكەرى ب.دەمەۋوۆ بولىپ تابىلاتىن ب.بايقاداموۆ اتىنداعى مەملەكەتتىك حور كاپەللاسىنىڭ «ۋنيۆەرسيادا-2017 ءانۇراندارى» اتتى كونتسەرتى وتەدى.
وسىلايشا, شەتەلدىكتەر اسەم الماتىنىڭ كورىكتى جەرلەرىن ارالاپ, قازاق حالقىنىڭ قوناقجايلىلىعىنا كۋا بولىپ, ۇلتتىق ونەردىڭ ۇلىلىعىنا ءتانتى بولادى دەگەن سەنىمدەمىز.
«ەگەمەن-اقپارات»