شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى تاعى ءبىر قۋانىش ۇستىندە. ەلىمىزدەگى بەدەلدى ءبىلىم ورداسى «پرەزيدەنت جانە ۋاقىت» رەسپۋبليكالىق قوعامدىق-ساياسي گازەتىنىڭ «ۋاقىت تاڭداۋى – ۆىبور ۆرەمەني» اگەنتتىگىمەن بىرلەسكەن جوباسى اياسىندا «جىلدىڭ ۇزدىك جوعارى وقۋ ورنى» بايقاۋىنىڭ جەڭىمپازى اتاندى. بۇل شارا قازاقستان تاۋەلسىزدىگىنىڭ 25 جىلدىق مەرەكەسىنە ورايلاستىرىپ ۇيىمداستىرىلعان بولاتىن. وسىعان بايلانىستى كوكشەتاۋدا ماراپاتتاۋ سالتاناتى وتكىزىلدى.
مارتەبەلى ماراپاتتى گازەتتىڭ باس رەداكتورى, پەداگوگيكالىق عىلىمدار اكادەمياسىنىڭ اكادەميگى مارات توقاشباەۆ ۋنيۆەرسيتەت رەكتورى ءابدىمۇتالىپ ابجاپپاروۆقا تابىس ەتتى. اقمولا وبلىسى اكىمىنىڭ ورىنباسارى نۇرلان نۇركەنوۆ ۋنيۆەرسيتەتتىڭ وقىتۋشىلىق-پروفەسسورلىق قۇرامىن, ستۋدەنتتەردى قۇتتىقتاپ, ءبىلىم نارىعىنداعى جاڭا جەتىستىكتەرگە جەتۋىنە تىلەكتەستىگىن ءبىلدىردى.
سولتۇستىك وڭىردەگى بەلدى ۋنيۆەرسيتەت العاشقىلار قاتارىندا ءۇش دەڭگەيلى وقىتۋ جۇيەسىن ەنگىزىپ, يگى ىزدەنىستەرىمەن كوزگە تۇسۋدە. وقۋ ورنى الەمدەگى 50 وزىق عىلىمي ورتالىقتارمەن ارىپتەستىك بايلانىس ورناتقان. 2009-2016 جىلدار ارالىعىندا «تەمپۋس ءىV» 6 جوباسىن جانە جوعارى ءبىلىم الەۋەتىن ارتتىرۋعا باعىتتالعان «ەرازمۋس پليۋس KAZ» 4 جوباسىن ۇتىپ الدى. زاماناۋي زەرتحانا دا تابىستى جۇمىس ىستەۋدە. ۋنيۆەرسيتەت وقىتۋشىلارى – 300-دەن استام پاتەنتتىڭ اۆتورى. «بولاشاق» باعدارلاماسى بويىنشا 15 تۇلەك اقش پەن ۇلىبريتانيانىڭ تاڭداۋلى وقۋ ورىندارىنىڭ ماگيستراتۋراسىندا, 30 ستۋدەنت اكادەميالىق موبيلدىك جۇيەمەن شەتەلدىك جانە قازاقستاندىق جوعارى وقۋ ورىندارىندا ءبىلىم الۋدا.
باقبەرگەن امالبەك,
«ەگەمەن قازاقستان»
اقمولا وبلىسى