مۇنايلى ايماقتا ۆيرتۋالدى كەن ورنى زەرتحاناسى اشىلدى. اتىراۋ مۇناي جانە گاز ۋنيۆەرسيتەتىندە تانىستىرىلىمى وتكەن جوبانىڭ جالپى قۇنى 74 ميلليون تەڭگە تۇرادى. قازىرگى زامانعى قۇرال-جابدىقتارمەن قامتىلعان زەرتحانادا ەندى ستۋدەنتتەر اۋديتورلىق, ءدارىس بەرۋ, قاشىقتىقتان وقىتۋ جانە 3D ارقىلى تاجىريبەلىك ساباقتاردان وتەدى. ناقتىراق ايتساق, ۇيرەنۋشى ارنايى پۋلت ارقىلى ءوزى تاڭداعان ورىنعا بارىپ, قىزىقتىرعان زاتىمەن تانىسادى. وتكەن تاقىرىپ بويىنشا تاپسىرمانى ورىنداعان سوڭ, كەلەسى كەزەڭدەگى ۆيرتۋالدى ستەندتەرگە بارىپ, ءوز قولىمەن تاجىريبە جاساپ كورەدى. جاڭا جۇيەنىڭ تاعى ءبىر ارتىقشىلىعى – ستۋدەنتتەر كەن ورنىن ىزدەپ تابۋدان باستاپ, ۇڭعىمالاردى بارلاۋ مەن جويۋعا دەيىنگى جۇمىستاردىڭ ءبارىن رەتتەيدى, تەحنولوگيالىق پروتسەستەردى جۇرگىزەدى.
ۇدەمەلى يندۋستريالىق-يننوۆاتسيالىق دامۋ باعدارلاماسى ءۇشىن ەلىمىزدەگى 11 جوعارى وقۋ ورنى مامان دايىندايدى. سولاردىڭ اراسىنان العاش بولىپ ۆيرتۋالدى كەن ورنىنا اتىراۋلىق ستۋدەنتتەر قول جەتكىزدى. زاماناۋي زەرتحانادا تەك ستۋدەنتتەر عانا ەمەس, ايماقتاعى مۇناي-گاز مەكەمەلەرىندە قىزمەت ەتەتىن جۇمىسشىلار دا بىلىكتىلىكتەرىن جەتىلدىرە الادى.
اتىراۋ مۇناي جانە گاز ۋنيۆەرسيتەتىنىڭ كافەدرا مەڭگەرۋشىسى نۇرلىبەك شۇعاەپوۆتىڭ ايتۋىنشا, زەرتحانادا ستۋدەنتتەر ەكىنشى كۋرستان باستاپ وقيدى. بارلىق مىندەتتەردى جاقسى ورىنداعاندار دۋالدى وقىتۋ جۇيەسىنە كوشەدى, ياعني ءار ايدىڭ ءبىرىنشى جارتىسىندا ۋنيۆەرسيتەتتە ءدارىس السا, ەكىنشى جارتىسىندا كاسىپورىنداردا ەڭبەك ەتەدى. بۇل ءادىس – جوعارى وقۋ ورنىن اياقتاعان ستۋدەنتتىڭ دايىن مامان بولىپ شىعۋىنا جاسالعان ۇلكەن مۇمكىندىك.
باقىتگۇل باباش,
«ەگەمەن قازاقستان»
اتىراۋ