ءتاڭىرىم قازاققا بەرەرىن تاۋىسپاسىن. ءبىر ديماش اسپاناستى ەلىنىڭ ميللياردىن اۋزىنا قاراتىپ, حالقىنىڭ مەرەيىن تاسىتىپ جاتسا, قوستانايدىڭ رۋدنىي قالاسىنان تاعى ءبىر ديماش ءان الەمىنە قانات قاقتى. 21 جاستاعى جىگىت «ەۆرازيا» 1» ارناسىنان كورسەتىلەتىن «گولوس كازاحستانا» جوباسىنا قاتىسىپ, جەڭىمپاز اتانىپ, 7 ميلليون تەڭگەنىڭ سەرتيفيكاتىنا يە بولدى. وندا ول مايكل دجەكسوننىڭ, روبەرتينو لورەتتيدىڭ, ۆلاديمير پرەسنياكوۆتىڭ رەپەرتۋارىنان اندەر ورىنداپ, كورەرمەنىن دە, قاتال سىنشى قازىلار القاسىن دا ريزا ەتتى. ونىڭ الدىندا «ح-فاكتور» جوباسىنا دا قاتىسقان بولاتىن. وندا تاجىريبەسى جەتىسىڭكىرەمەسە دە, ديماش داۋلەتوۆتىڭ ەرەكشە داۋىسى ءۇشىن قازىلار القاسىنىڭ پىكىرى ەكىگە جارىلعان بولاتىن. جوبانىڭ اياعىنا دەيىن جەتە الماعانى انگە ىنتىزار جىگىتتىڭ رۋحىن جاسىتقان جوق, قايتا ارمانىن اسقاقتاتا تۇسكەن سەكىلدى بولدى.
نەگىزى, ديماشتىڭ ەسىمى – دىنمۇحامەد. وزبەكستاندا ءجۇرىپ اڭسارى اتامەكەن بولعان قانداستاردىڭ شاڭىراعىندا ۇل تۋعاندا قازاقستاندى كوپ جىل باسقارعان, قازاقتىڭ ءبىرتۋار ۇلى ءدىنمۇحامەد قوناەۆ اتاسىنىڭ ەسىمىن بەرىپ, ازان شاقىرعان عوي. دىنمۇحامەد اتاسى سەكىلدى بۇل ۇل دا ديماش اتاندى. ول 9-سىنىپقا كوشكەندە اتا-اناسى رۋدنىي قالاسىنا كوشىپ كەلدى. وزبەكستاننىڭ ناۋاي وبلىسىنان كەلگەن اعايىندار شەتىنەن كەنشى. ديماش ءداۋلەتوۆ تە مەكتەپتى بىتىرە سالا كەنشىلەر قالاسىنداعى قۇرىلىس جانە كولىك-تەحنيكالىق كوللەدجىنە ءتۇستى, ەكسكاۆاتوردى شىر كوبەلەك اينالدىراتىن, بۇگە-شىگەسىنە دەيىن جوندەيتىن مامان بولىپ شىقتى. سوكولوۆ-سارىباي كەن ءوندىرۋ ءبىرلەستىگىنىڭ اۆتوكولىك باسقارماسىنىڭ تەحنيكا جوندەۋ تسەحىندا سلەسار بولىپ ەكى جىل ىستەدى. ۇلدىڭ قولى جۇمىستا بولعانمەن, كوكىرەگىن ءان كەرنەيتىن.
وزبەكستاننان اتاجۇرتقا قونىس اۋدارعان اعايىننىڭ جاستارىندا ۇلكەننىڭ الدىنان وتپەيتىن, ۇلكەن تۇرىپ, كىشى سويلەمەيتىن يبالىق, قازاق, ورىس, وزبەك تىلدەرىندە سايراپ تۇرسا دا, «مەن» دەپ كوكىرەگىن ۇرمايتىن ۇياڭدىق كوزگە ۇرىپ تۇرادى. سول مىنەز, سول ءدىل ءداۋلەتوۆتىڭ وسكەن وتباسىنا دا ءتان ەدى.
– ءاندى ۇيدە ايتىپ جۇرەمىن, بىراق ونى كوپشىلىك بىلە بەرمەيتىن. كوللەدجگە تۇسەردە ۇستازدار «قانداي ونەرىڭ بار؟» دەپ سۇرادى. مەن وقۋعا تۇسۋگە كومەك بولا بەرسىن دەپ, ويلانىپ وتىردىم دا «ءان ايتامىن» دەدىم. سودان وقىپ جۇرگەندە ۇستازىم ايگۇل امانجولقىزى مەنى بولماي ساحناعا شىعاردى. بارلىعى سودان باستالدى, – دەيدى د.ءداۋلەتوۆ.
كەنشىلىك جۇمىستى ول ۇناتپاي قالعان جوق, تابىسى دا جامان ەمەس ەدى. الايدا, ءان مەن كەن ءبىر ديماشقا اۋىر سوعاتىنىن سەزدى. سونان سوڭ استاناعا بارىپ, مۋزىكالىق ءبىلىم العىسى كەلدى. قازىر باس قالاداعى قازاق ۇلتتىق ونەر ۋنيۆەرسيتەتىنىڭ ەسترادالىق ۆوكال فاكۋلتەتىنىڭ دايىندىق كۋرسىنا ءتۇستى. «گولوس كازاحستانا» تەلەجوباسىندا قازىلار القاسى ءداۋلەتوۆتىڭ داۋىسىنا ەرەكشە باعا بەردى. ەر ادامداردا سيرەك كەزدەسەتىن داۋىس دەپ تانىدى.
– مەنىڭ داۋىسىمدى روبەرتينو لورەتتيدىڭ داۋىسىنا ۇقساتادى. مەنىڭ ارمانىم – روبەرتينوعا ۇقساۋ ەمەس, مۋزىكالىق ءبىلىم الىپ, ءوز داۋىسىمدى تابۋ, – دەيدى ديماش داۋلەتوۆ. ول ونەر جولىنىڭ قيىندىعى دا كەنىشتىڭ بەينەتىنەن كەم ەمەس ەكەنىن بىلەدى. بىراق ونەر ونى تاڭداعانداي.
ءنازيرا جارىمبەتوۆا,
«ەگەمەن قازاقستان»
قوستاناي