قازاقستان پرەزيدەنتى نۇرسۇلتان نازارباەۆ 28-ءشى دۇنيەجۇزىلىك قىسقى ۋنيۆەرسيادا ويىندارىن اشىق دەپ جاريالادى.
«بۇگىن ۇلى دالا ەلىندە سالتاناتتى سپورتتىڭ – ۇلى مەرەكەسى. جاستار سايىسىنا 57 ەلدەن 2 مىڭنان استام سپورتشى, مىڭداعان سپورت مامانى مەن جانكۇيەر جينالدى. سپورت بەيبىتشىلىك پەن تاتۋلىقتىڭ, ىنتىماقتاستىق پەن تىلەكتەستىكتىڭ سيمۆولى. قوناقجاي قازاقستان جەرىنە حوش كەلدىڭىزدەر!» – دەدى مەملەكەت باسشىسى.
«جەر جاھان كوز تىككەن بۇل ۋنيۆەرسيادا ناعىز جاستىق جىگەردىڭ ارمانى, جارقىن جەڭىستەردىڭ باستاۋى, بولاشاق وليمپيادا چەمپيوندارىنىڭ مەكتەبى. قىسقى ۋنيۆەرسيادا تاۋەلسىز مەملەكەتتەر دوستاستىعى اۋماعىندا تۇڭعىش رەت ءبىزدىڭ ەلىمىزدە وتكىزىلىپ وتىر, بۇل – ءبىزدىڭ ەلىمىز ءۇشىن مارتەبە», – دەدى ەلباسى.
سونىمەن قاتار, پرەزيدەنت ۋنيۆەرسيادا قارساڭىندا الماتىدا بىرنەشە سپورت نىسانى سالىنعانىن ايتىپ ءوتتى. «مۇنىڭ ءبارى وتاندىق سپورتتىڭ ينفراقۇرىلىمىنا سالىنعان ينۆەستيتسيا», - دەدى ەلباسى.