قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەستى.
مەملەكەت باسشىلارى اڭگىمە بارىسىندا كۇن تارتىبىندەگى وزەكتى جاھاندىق ماسەلەلەر, سونىڭ ىشىندە استانادا وتكەن سيرياعا قاتىستى حالىقارالىق كەزدەسۋ قورىتىندىلارى جونىندە پىكىر الماستى.
ۆلاديمير پۋتين استانادا سيرياارالىق كەلىسسوزدەردى جوعارى دەڭگەيدە ۇيىمداستىرۋعا بارلىق قاجەتتى جاعدايدى جاساعانى ءۇشىن نۇرسۇلتان نازارباەۆقا العىس ءبىلدىردى.
قازاقستان پرەزيدەنتى سيريا داعدارىسىن رەتتەۋ تەك بەيبىت جولمەن جۇرگىزىلۋگە ءتيىس ەكەنىن اتاپ ءوتىپ, الداعى ۋاقىتتا دا بۇل ۇدەرىسكە جان-جاقتى قولداۋ كورسەتۋگە ءازىر ەكەنىن ايتتى.
سونداي-اق, قازاقستان مەن رەسەي پرەزيدەنتتەرى الداعى كەزدەسۋلەر كەستەسىن قاراستىردى.