وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ۆەنگريانىڭ سىرتقى ەكونوميكالىق بايلانىستار جانە سىرتقى ىستەر مينيسترلىگىنىڭ مەملەكەتتىك حاتشىسى ميكلوش يشتۆاندى جانە ۆەنگريانىڭ قازاقستانداعى توتەنشە جانە وكىلەتتى ەلشىسى اندراش بارانيمەن كەزدەستى. باسقوسۋدا تاراپتار ەكىجاقتى ءوزارا ءتيىمدى ىنتىماقتاستىق ماقساتىنداعى بىرلەسكەن جوبالاردىڭ جۇزەگە اسۋ بارىسىن تالقىلادى. بۇل تۋرالى وبلىستىڭ ءباسپاسوز قىزمەتى حابارلادى.
«تاريحقا كوز جۇگىرتسەك, ەكى ۇلت تا كەڭ دالادا تىرشىلىك ەتكەن. سوندىقتان بولار, ۆەنگر تىلىندە تۇركى سوزدەرى كوپ كەزدەسەدى. وسىنىڭ ءوزى ءبىزدىڭ حالىقتاردىڭ ەجەلدەن تاتۋ قارىم-قاتىنىستا بولعاندىعىن اڭعارتادى. بۇدان بىلاي وتۇستىك قازاقستان وبلىسى مەن ۆەنگريا ەلىنىڭ اراسىندا ساۋدا ەكونوميكالىق, مادەني, گۋمانيتارلىق بايلانىستار نىعايا تۇسەتىنىنە سەنىمدىمىن», – دەدى جانسەيىت قانسەيىت ۇلى.
اگرارلىق سالاعا بەيىم وڭتۇستىك قازاقستان وبلىسى ۆەنگريالىق ينۆەستورلاردىڭ قىزىعۋشىلىعىن تۋدىرىپ وتىر. ايماق باسشىسى ەلشىلىك وكىلدەرىنە وسى ارتىقشىلىقتار تۋرالى جان-جاقتى بايانداپ بەردى. كەزدەسۋدە ءسوز العان اندراش باراني ەكى ەل اراسىنداعى ساياسي, ەكونوميكالىق, الەۋمەتتىك, مادەني سالادا بىرلەسكەن جوبالاردىڭ جۇزەگە اسىپ جاتقانىن جەتكىزدى.
«بۇگىندە ۆەنگرلەر قازاقستانعا ۆيزا راسىمدەمەي-اق كەلۋىنە مۇمكىندىك بار. بۇل ءوز كەزەگىندە كاسىپكەرلىك سالاسىن دامىتۋعا, ىسكەرلىك قارىم-قاتىناستى نىعايتۋعا زور مۇمكىندىك بەرەدى», – دەدى ەلشى.
كەلەلى كەزدەسۋدەن كەيىن ەكى تاراپتىڭ قاتىسۋىمەن ۆەنگريانىڭ شىمكەنت قالاسىنداعى كونسۋلدىعىنىڭ اشىلۋ سالتاناتى ءوتتى. جاڭادان اشىلعان وكىلدىك الداعى ۋاقىتتا ەكى مەملەكەت اراسىنداعى ستراتەگيالىق ارىپتەستىكتى نىعايتىپ, تاۋار اينالىمى ۇلعايىپ, ينۆەستيتسيا تارتۋعا دا سەپتىگىن تيگىزبەك.
ۆەنگريانىڭ قازاقستان رەسپۋبليكاسىنداعى قۇرمەتتى كونسۋلى بولىپ «OTAU Group» كومپانياسىنىڭ پرەزيدەنتى, بەلگىلى مەتسەنات قايرات مولداسەيىتوۆ تاعايىندالدى.
ۆەنگريانىڭ سىرتقى ەكونوميكالىق بايلانىستار جانە سىرتقى ىستەر مينيسترلىگىنىڭ مەملەكەتتىك حاتشىسى ميكلوش يشتۆان قايرات مولداسەيىتوۆكە قۇرمەتتى كونسۋل قىزمەتىن اتقارۋ پاتەنتىن سالتاناتتى تۇردە تابىس ەتتى. سونىمەن قاتار, ەكى ەلدىڭ وكىلدەرى قۇرمەتتى كونسۋل دەكلاراتسياسىنا قول قويدى.