وبلىس اكىمى سەرگەي كۋلاگين تمد بايقاۋشىلار ميسسياسىنىڭ وكىلدەرىمەن كەزدەستى. بايقاۋشىلار رەسەيدىڭ قوستانايمەن شەكتەسەتىن چەليابى وبلىسىنان كەلىپتى. توپتى چەليابى وبلىستىق اكىمشىلىگىنىڭ ايماقتارمەن جۇمىس ءجونىندەگى باسقارماسىنىڭ باستىعى ۆيتالي شيكوۆ باستاپ كەلدى. الدىمەن ايماق باسشىسى قوناقتاردى وبلىس تىنىسىمەن تانىستىردى. ال چەليابىلىك بايقاۋشىلاردىڭ بۇل قوستانايعا ءبىرىنشى رەت كەلۋى ەمەس ەدى.
– قاتار جاتقان ەل بولعاندىقتان, قازاقستاننىڭ ساياسي, ەكونوميكالىق ومىرىنەن حابارىمىز مول. ءبىز ءماسليحاتتار سايلاۋىندا دا, سوڭعى پرەزيدەنتتىك سايلاۋعا دا كورشى قوستاناي وبلىسىنا بايقاۋشى رەتىندە كەلگەن ەدىك. مىنە, ەندى بۇكىل دۇنيە قاراپ وتىرعان مەرزىمىنەن بۇرىن وتكەلى وتىرعان پرەزيدەنتتىك سايلاۋعا تاعى دا كەلدىك. «كورشى حاقىسى» دەگەن بار, ونىڭ ۇستىنە ءبىر-بىرىمىزدەن ءۇيرەنەرىمىز دە مول, – دەدى دەلەگاتسيا جەتەكشىسى ۆيتالي شيكوۆ. چەليابىدەن 21 بايقاۋشى كەلدى. ولار قالالار مەن اۋداندارعا بارىپ, داۋىس بەرۋ بارىسىن باقىلايتىن بولادى.
كەزدەسۋدە وبلىستىق سايلاۋ كوميسسياسىنىڭ ءتورايىمى انتونينا ماركوۆا بايقاۋشىلاردى سايلاۋعا دايىندىقتىڭ نەگىزىنەن اياقتالعانىنان حاباردار ەتتى. وبلىستا 4 قالالىق, 16 اۋداندىق جانە 860 ۋچاسكەلىك سايلاۋ كوميسسياسى بار. ولاردىڭ بارلىعى دا جۇمىسقا قاجەتتى ۇيىمداستىرۋ تەحنيكالارىمەن, قۇرالدارمەن زاڭ شەڭبەرىندە جابدىقتالدى.
كەزدەسۋدە چەليابىلىك بايقاۋشىلار وبلىستىق سايلاۋ كوميسسياسىنىڭ ءتورايىمىنا سايلاۋشىلاردىڭ سايلاۋعا قاتىسۋى ءۇشىن قانداي جۇمىستار جۇرگىزىلگەندىگى تۋرالى ساۋالدار قويدى. انتونينا ميحايلوۆنا ولارعا دايىندىق جۇمىستارى تۋرالى اڭگىمەلەي كەلىپ, قوستانايلىقتار ەلىمىزدىڭ تاعدىرىنا سالعىرت قاراي المايتىندىعىن, وتكەن پرەزيدەنتتىك سايلاۋدا دا وبلىستاعى سايلاۋشىلاردىڭ 85,5 پايىزى سايلاۋ ۋچاسكەلەرىنە كەلىپ, داۋىس بەرگەندىگىن ايتتى. سايلاۋ كوميسسياسىنىڭ ءتورايىمى بۇل جولى دا قوستانايلىقتاردىڭ داۋىس بەرۋگە بەلسەندىلىكپەن كەلىپ, ءوز تاڭداۋىن جاسايتىندىعىنا سەنىمدى.
سونىمەن قاتار, پرەزيدەنتتىك سايلاۋدىڭ دەموكراتيالىق دەڭگەيدە ءوتۋىن باقىلاۋ ءۇشىن وبلىسقا ەقىۇ-دان ەكى ۇزاق مەرزىمدى جانە 23 قىسقا مەرزىمدى بايقاۋشى كەلدى.
ءنازيرا جارىمبەتوۆا.
قوستاناي.