انگليانىڭ كۇندەلىكتى شىعاتىن «Guardian» گازەتىنىڭ حابارىنا قاراعاندا, مۋاممار كاددافيدىڭ سەنىمدى وكىلى وسى ەلدىڭ بيلىگىمەن كەلىسسوز جۇرگىزۋگە كەلىپتى. ول داعدارىستان شىعۋدىڭ «ستراتەگياسىن تالقىلاۋدى» ۇسىنعان كورىنەدى.
بۇل ءتريپوليدىڭ كواليتسيا اۆياسوققىلارى باستالعاننان بەرگى بەيبىت كەلىسىمگە ۇمتىلعان العاشقى قادامى ەمەس. مۇنىڭ الدىندا اقش-تىڭ مەملەكەتتىك حاتشىسى ح.كلينتون دا كاددافيدىڭ ادامدارى وزدەرىمەن كەلىسىم جاساۋعا تىرىسقاندارى تۋرالى جاريالاعان ەدى. وسىنىڭ الدىندا ۇلىبريتانياعا ليۆيانىڭ سىرتقى ىستەر ءمينيسترى مۋسا كۋسا ۇشىپ كەلىپ, كاددافيدىڭ ساياساتىنان باس تارتاتىنىن مالىمدەپ, ساياسي باسپانا سۇراعان ەدى.
جۇمسارتسا دا جۇلقىنۋلارىن قويمايدى
بەلورۋسسياداعى پرەزيدەنتتىك سايلاۋ وتكەلى ءۇش ايدان بەرى باسىلماي كەلە جاتقان داۋدىڭ داۋاسىن تابۋعا قادام جاسالدى. بيلىك سايلاۋ كەزىندە ەلدى ەرەۋىلگە شىعۋعا ۇگىتتەگەندەردىڭ ارەكەتىن ەندى قوعامدىق ءتارتىپتى ءدورەكىلىكپەن بۇزۋ دەگەن باپپەن ايىپتايتىنىن جاريالادى.
بۇل باپپەن ولارعا قولدانىلاتىن جازانىڭ ەڭ اۋىرى التى ايعا دەيىن باس بوستاندىعىنان ايىرۋ, ايتپەسە, ايىپپۇلمەن قۇتىلتۋ. ال ايىپتاۋدىڭ بۇرىنعى بابى «جاپپاي ءتارتىپسىزدىككە جول بەرۋ» بولاتىن. بۇل باپپەن ءتارتىپسىزدىكتى ۇيىمداستىرۋشىلار 15 جىلعا دەيىن سوتتالۋى مۇمكىن ەدى. بىراق وپپوزيتسيا بيلىكتىڭ بۇل قادامىنا دا دەن قويىپ وتىرعان جوق, ولار وزدەرىن تولىعىمەن اقتاۋدى تالاپ ەتۋدە.
ەرەۋىلگە تىيىم سالۋعا قارسىلىق
ماسكەۋ مەن سانكت-پەتەربۋرگتە رەسەي كونستيتۋتسياسىنىڭ قارسىلىق ميتينگىلەرىن وتكىزۋگە تىيىم سالاتىن 31-بابىنا قارسى «ستراتەگيا-31» اتتى شەرۋلەر جالعاسىپ كەلەدى. وعان ماسكەۋگە قاراعاندا ەلدىڭ ءسولتۇستىك استاناسىندا قاتىسقاندار بىرنەشە ەسە ارتىق بولدى.
ەلدىڭ استاناسىندا ەكى جەردە بولعان ميتينگتىڭ ءبىرىن جازۋشى ە.ليمونوۆ, ەكىنشىسىن ماسكەۋلىك حەلسينكي توبىنىڭ باسشىسى ل.الەكسەەۆا ۇيىمداستىردى. ەرەۋىلشىلەر باسشىلارىنىڭ ءبارىن دە پوليتسيا ۋاقىتشا تۇتقىنعا الدى. رەسەيدە 1 ناۋرىزدان باستاپ كۇشىنە ەنگەن «پوليتسيا تۋرالى» زاڭنىڭ تالابى بويىنشا ۇستار الدىندا پوليتسيا قىزمەتكەرى ءوزىن تانىستىرىپ, سوسىن تۇتقىندالۋشىنىڭ قۇقىن ايتىپ بەرۋى كەرەك-ءتىن. بىراق ۋاقىتشا تۇتقىنداۋ كەزىندە ونىڭ ءبىرى دە بولماعان.
ايلىعى جاقسى بولسا, اتوم دا قاۋىپسىز
اقش-تا جاپونياداعى «فۋكۋسيما-1» اەس-ءى جارىلىسىنىڭ زارداپتارىن جويۋعا كومەك بەرۋ ءۇشىن ماماندار توبىن جاساقتاۋ جۇرگىزىلىپ جاتىر. ولاردان بۇرىن اتوم ونەركاسىبىندە ىستەپ, تاجىريبە العاندىعى, سونىمەن بىرگە, جاقىن تۋىستارىنىڭ كەلىسىمى تالاپ ەتىلەدى.
الداعى جەكسەنبىدە اقش-تا جاساقتالعان 10 ادامنان تۇراتىن العاشقى توپ جاپونياعا اتتانباقشى. ادامداردى راديواكتيۆتى قاتەرى بار جەرگە بارۋعا ىنتالاندىرىپ وتىرعان, ارينە, اقشا. الدىن-الا ايتىلعان مالىمەت بويىنشا, ولارعا تولەنەتىن جالاقى وسى سالادا قالىپتى جاعدايدا قىزمەت ىستەيتىندەرگە قاراعاندا ەسەلەپ ارتتىرىلاتىن كورىنەدى.
جارىلىستاردى جاقىندارى دا جاسايدى
گرۋزيانىڭ ارناۋلى قىزمەتى كۋتايسي قالاسىنىڭ مەرياسى مەن ادىلەت ۇيىندە جارىلىس جاساماق بولعان ءۇش كۇدىكتىنى ۇستادى. ولاردىڭ كورسەتۋىنشە, جارىلىسقا تاپسىرىس بەرىپ, ۇيىمداستىرعان رەسەيدىڭ فەدەرالدىق قاۋىپسىزدىك قىزمەتىنىڭ (فقق) وفيتسەرى الەكسەي ۋشاكوۆ ەكەن.
بۇل رەسەي تاراپىنان ۇيىمداستىرىلىپ وتىرعان ءبىرىنشى لاڭكەستىك ەمەس. مۇندا 2010 جىلدىڭ كۇزىندە دە رەسەي فقق قاتىسقان جارىلىستار بولعان. ونى ۇيىمداستىرعان مايور ە.بوريسوۆ ەكەنى انىقتالىپ, گرۋزيا ينتەرپول تاراپىنان وعان ىزدەۋ سالۋعا قول جەتكىزگەن. سونىمەن بىرگە, گرۋزيا جاعى ادجار شەنەۋنىگى د.كوردادزەنىڭ ولىمىنە دە فقق-نىڭ قاتىستى ەكەنىن ايتىپ وتىر.
ءبىر-ءبىرىن ايىپتاۋدان تانباي تۇر
ۋكراينانىڭ بۇرىنعى پرەزيدەنتى لەونيد كۋچمانىڭ ۇستىنەن جۋرناليست گەورگي گونگادزەنىڭ ولىمىنە قاتىسى بار دەگەن كۇدىكپەن قىلمىستى ءىس قوزعالعان ەدى. وعان نەگىز بولعان ەكس-پرەزيدەنتتىڭ بۇرىنعى ساقشىسى ن.مەلنيچەنكونىڭ بەينەتاسپاسى بولاتىن.
ۆ.يۋششەنكونىڭ كەزىندە ءبىرشاما سايابىرسىعان سول ءىس قازىر قايتادان باس كوتەرىپ, وسى كۇندەرى ل.كۋچما دا, ن.مەلنيچەنكو دا ۋكراينا باس پروكۋراتۋراسىنا ءجيى كەلەتىن بولىپ ءجۇر. ل.كۋچما وزىنە تاعىلعان ايىپتى تولىعىمەن جوققا شىعارادى, ال ن.مەلنيچەنكو دا ونى ايىپتاۋىنان تانار ەمەس. جۋىردا ول ل.كۋچما قازىرگى پرەزيدەنت ۆ.يانۋكوۆيچتەن ءىستى قىسقارتۋدى تالاپ ەتىپ, بوپسالادى دەگەن مالىمدەمە تاراتتى.
قىسقا قايىرىپ ايتقاندا:
جۋىردا, كيەۆتە ليۆياداعى جاعدايدى سارالاعان رەسەي مەن ۋكراينا ساراپشىلارىنىڭ جيىنى بولدى. وندا ليۆياداعى سوعىس ەنەرگيا رەسۋرستارىن قايتا بولمەككە ۇمتىلىپ جاتقان الپاۋىتتاردىڭ الەگى دەپ باعالاندى.
اقش-تىڭ كۋيننيپياك ۋنيۆەرسيتەتى ساۋالداما جۇرگىزىپ, ونىڭ قورىتىندىسى بويىنشا ب.وبامانى قولدايتىندار ۇلەسى 42 پايىزعا دەيىن ءتۇسىپ كەتكەنىن انىقتادى. بۇل ناتيجە امەريكانىڭ ليۆيا سوعىسىنا ارالاسقانىنان كەيىن بولىپ وتىر.
كوت د’يۆۋاردا پرەزيدەنتتىك سايلاۋدا جەڭسە دە, تاققا قول جەتكىزە الماي وتىرعان ا.ۋاتتارانىڭ جاقتاستارى ل.گباگبونىڭ گۆاردياسىمەن قاتتى شايقاسۋدا. كەشە ولار مەملەكەتتىك تەلەۆيزيانى باسىپ الدى.
قىتاي عىلىم جەتىستىكتەرى جاعىنان قازىر الەمدە ەكىنشى ورىنعا شىقتى. ءتىپتى اقش-تاعى كوپتەگەن يننوۆاتسيالار مەن جاڭا تەحنولوگيالار قىتاي عالىمدارىنىڭ قولدارىمەن ىسكە اسا باستاعانى مويىندالىپ وتىر.
ءازىربايجان تاراپىنىڭ ستەپاناكەرتكە وتكەن ۇشاقتار اتىپ تۇسىرىلەدى دەگەنىنە قاراماستان, ارمەنيا پرەزيدەنتى س.سارگسيان تاۋلى قاراباقتاعى جاڭا اۋەجايعا ءبىرىنشى جولاۋشى بولىپ باراتىنىن جاريالادى.
ينتەرنەت ماتەريالدارى نەگىزىندە ازىرلەندى.