پارلامەنت ماجىلىسىندەگى «جاڭا قازاقستان» دەپۋتاتتىق توبى مەن جاستاردىڭ «باي-بارىس» ينتەللەكتۋالدىق كلۋبىنىڭ مۇشەلەرى بىرىگىپ «بولاشاقتىڭ ىرگەسىن بىرگە قالايمىز!» جولداۋىن جاستاردىڭ كوزقاراسىمەن جاڭاشا تالداعان دوڭگەلەك ۇستەل وتكىزدى.
ءماجىلىس دەپۋتاتى ليۋدميلا حوچيەۆا بەتاشار ءسوز سويلەدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى الكەي مارعۇلان ۇلى دوڭگەلەك ۇستەلگە مودەراتورلىق جاسادى. ول قازاقستان رەسپۋبليكاسىنىڭ حالىقارالىق قوعامداستىقتاعى ورنى مەن الداعى ۋاقىتتاعى سىرتقى ساياسي باسىمدىقتارىنا ەرەكشە توقتالىپ, ونىڭ ۇلتتىق قاۋىپسىزدىككە, قوعامنىڭ دامۋىنا, ەڭ باستىسى, مەملەكەتىمىزگە اسەرى حاقىنداعى سۇراقتارعا جاۋاپ رەتىندە «سىرتقى پراگماتيزم – قازاقستان ديپلوماتياسىنىڭ نەگىزى» دەپ اتالاتىن تاقىرىپتا بايانداما جاسادى.
ەۋرازيا ۇلتتىق ۋنيۆەرسيتەتىنىڭ ستۋدەنتتەرى اسحات اتاۋ «ەكونوميكالىق دامۋ ارقىلى ساپالى دامۋ جولىندا», ءمۇسىلىم حاسەنوۆ «الەۋمەتتىك مودەرنيزاتسيا» دەگەن تاقىرىپتاردى تالداپ ءسويلەدى.
«2020 جىلعا قاراي باعىتتالعان عىلىمي-تەحنولوگيالىق دامۋدى ساپالى جۇرگىزۋ ءۇشىن ەۋروپا ەلدەرىندە, جاپونيا, اقش, قىتاي جانە رەسەيدە قىزمەت تاجىريبەسىندە فورسايت ادىستەمەسى قولدانىلىپ كەلەدى. فورسايتتىڭ ءمانى «بولاشاق جايلى ويلانۋدا» عانا ەمەس, بولاشاقتى تالقىلاۋدا, ونىڭ كورىنىسىن قالىپتاستىرۋ مەن قابىلدانعان ۇلگىگە قول جەتكىزۋ جولىندا كۇش جۇمىلدىرۋدا. بۇل ۇدەرىسكە ونداعان, جۇزدەگەن, مىڭداعان ادامدار تارتىلادى. قانداي دا ءبىر ەكونوميكا سەكتورىنىڭ دامۋى, نەمەسە قالاداعى نەمەسە وبلىستاعى الەۋمەتتىك-ەكونوميكالىق جاعدايدىڭ ءىس بارىسى سولارعا بايلانىستى. ءبىر ارتىقشىلىعى – ەشقانداي سىرتقى ماجبۇرلەۋ كۇشىمەن ەمەس, تابيعي تۇردە باعدارلاناتىن بولادى. فورسايت – قازىرگى قوعام مۇشەلەرىن ولاردىڭ جاۋاپكەرشىلىگى ارقىلى سىپايى تۇردە «بىرلەسىپ باسقارۋ».
قازاقستان ءوز ەكونوميكاسىندا باسەكەگە قابىلەتتى ءارتاراپتاندىرۋ ساياساتىن ۇستانۋى قازىرگى زامان تالابىنا ساي كەلەدى, الايدا ەلدىڭ مۇمكىنشىلىگىن ەسكەرە وتىرىپ, پەرسپەكتيۆادا قايتارىمى مول بولاتىن سالالارعا باستى كۇش جۇمسالۋى قاجەت. الەمدەگى ءىرى ەكونوميكا ساراپشىسى مايكل پورتەر قازاقستاننىڭ الەمدە باسەكەگە قابىلەتتى بولۋىنا ءمۇمكىندىك بەرەتىن 5 باسىم سالانى ءبولىپ شىعاردى. ولار: مۇناي حيمياسى, مەتاللۋرگيا, ماشينە جاساۋ, تۋريزم, اتوم ەنەرگەتيكاسى.
دوڭگەلەك ۇستەلگە قاتىسۋشى ءماجىلىس دەپۋتاتتارى مەن كلۋب مۇشەلەرى بايانداماشىلارعا سۇراق قويىپ, تاقىرىپتاردى كەڭىنەن تالقىلادى. سونداي-اق ءدوڭگەلەك ۇستەلدە جاستار ساياساتى, تازا اۋىز سۋ مەن تۇرعىن ءۇي ماسەلەلەرى دە ءسوز بولدى. «بولاشاقتىڭ ىرگەسىن بىرگە قالايمىز!» جولداۋىن تالداعان دوڭگەلەك ۇستەلگە قاتىسۋشىلار ۇسىنىمدار قابىلدادى. وندا «مەملەكەتتىك جاستار ساياساتى تۋرالى» زاڭدى جەتىلدىرۋ جايى دا نازاردان تىس قالعان جوق. بۇل ورايدا ۇلتتى باسەكەگە قابىلەتتى ەتۋ باعىتىندا تاربيەلەيتىن ءۇلكەن باعدارلاما قاجەت ەكەنى دە اتاپ كورسەتىلدى.