تاياۋ كۇندەردە قوعامدىق سالاداعى انتيسەميتيزمگە قارسى ءىس-قيمىل جونىندەگى پارلاگادا وتكەن جوعارى دەڭگەيدەگى كونفەرەنتسياعا پارلامەنت سەناتىنىڭ دەپۋتاتى, ەقىۇ-نىڭ ءىس باسىنداعى توراعاسىنىڭ مۇسىلماندارعا قاتىستى توزبەۋشىلىك جانە كەمسىتۋشىلىكپەن كۇرەس جونىندەگى جەكە وكىلى ءادىل احمەتوۆ قاتىستى, دەپ حابارلادى سەناتتىڭ ءباسپاسوز قىزمەتى.
ليتۆا توراعالىق ەتەتىن ەقىۇ ۇيىمداستىرعان شاراعا ۇيىمعا قاتىسۋشى 32 ەلدىڭ دەلەگاتتارى, ۇەۇ جانە حالىقارالىق ۇيىمدار وكىلدەرى كەلدى. كونفەرەنتسيانىڭ كۇن تارتىبىنە قويىلعان ماسەلەلەردى تالقىلاۋ بارىسىندا تولەرانتتىلىقتى قامتاماسىز ەتۋ جانە ىلگەرىلەتۋدەگى, انتيسەميتيزمگە قارسى كۇرەستەگى كۇش-جىگەردى قولداۋعا باعىتتالعان تەتىكتەردى قالىپتاستىرۋداعى بۇقارالىق اقپارات قۇرالدارىنىڭ ءرولى اتاپ ءوتىلدى.
پىكىرسايىس بارىسىندا ءسوز العان ءا.احمەتوۆ بۇل سالاداعى اقپارات رەسۋرستارىنىڭ دەرەكتەر بەرۋ تاجىريبەسى انتيسەميتتىك ىڭعايداعى شارالاردىڭ جولىن كەسۋگە ەمەس, ونى قوزدىرۋعا ىقپال ەتەتىنىن اتاپ ءوتتى. سەناتوردىڭ ايتۋىنشا, ناسىلشىلدىك, كسەنوفوبيا, انتيسەميتيزم جانە توزبەۋشىلىكتىڭ باسقا دا تۇرلەرى ءبىر قۇبىلىستىڭ الۋان قىرلارى بولىپ تابىلادى. ول سونداي-اق حولوكوستقا اكەلىپ سوققان انتيسەميتيزمدى زەردەلەۋ تولەرانتتىلىقتى ىلگەرىلەتۋگە جانە توزبەۋشىلىكتىڭ, ناسىلشىلدىكتىڭ جانە كسەنوفوبيانىڭ جولىن كەسۋگە ىقپال ەتەتىن ءبىلىم بەرۋدىڭ ماڭىزدى بولىكتەرى بولا الاتىنى تۋرالى پىكىرىن ءبىلدىردى.