ۇكىمەت وتىرىسىندا پرەمەر-ءمينيستردىڭ ءبىرىنشى ورىنباسارى اسقار مامين رەسەي فەدەراتسياسىنىڭ قازاقستاندىق كومىردى ساتىپ الۋ كولەمىن ازايتاتىندىعىن, دەگەنمەن, ەكىباستۇز كومىرىن كورشى قىتاي ەلىنە ساتۋعا بولاتىندىعىن جەتكىزدى.
"ارينە, بىزگە وسى سالادا بولىپ جاتقان وزگەرىستەردى ەسكەرىپ وتىرۋ قاجەت. ماسەلەن, كورشى رەسەي 2030 جىلعا دەيىن كومىر ءوندىرىسىن 400 ملن. توننادان 500 ملن.-عا دەيىن ارتتىرۋدى جوسپارلاپ وتىر. وعان قوسا, ەكىباستۇز كومىرىن ءوز كومىرىمەن الماستىرامىز دەپ جاتىر. وسىنىڭ ءبارى قازاقستاندىق شيكىزاتتىڭ ەكسپورتىن قىسقارتۋى ابدەن مۇمكىن. سوندىقتان بىزگە جاڭا نارىقتاردى ىزدەۋ كەرەك. كولىكتىك-لوگيستيكا جاعىن دا الدىن الا ويلاستىرىپ قويعان ءجون. وسى ورايدا, قىتايدىڭ كومىر يمپورتىن 200 ملن. تونناعا دەيىن ارتتىرىپ وتىرعانىن اتاپ ءوتۋ كەرەك. وسىنى زەردەلەپ, شەكارا جاقىن ايماقتاردان كومىر جەتكىزۋ ماسەلەسىن قاراستىرۋعا بولادى", - دەدى مامين.
دەگەنمەن, ۇكىمەت باسشىسى باقىتجان ساعىنتاەۆ الدىمەن ەكولوگيالىق ماسەلەلەردى ەسكەرۋ كەرەكتىگىن جەتكىزدى.
"ەكىباستۇزدى ءبارىمىز جاقسى بىلەمىز. ول جاقتا بولعاندار ەكولوگياسىن دا كورگەن. وسى ورايدا ناقتى ءبىر شارالاردى, سونىڭ ىشىندە كومىر xيمياسىن دامىتۋدى قولعا العان دۇرىس. كومىر پلاستتارىنان مەتاندى الۋ اسا ماڭىزدى. سول ءۇشىن بۇگىن مامانداردى شاقىرىپ وتىرمىز. ولادىڭ پىكىرىن تىڭدايىق, تاجىريبەسىن زەردەلەيىك دەپ, ارنايى شاقىردىق. سەبەبى ءسىز, اسقار ۇزاقباي ۇلى, جانا قىتايدىڭ كومىر يمپورتىن ۇلعايتقانى جايىندا ايتىپ وتىرسىز عوي. مەنىڭ بىلۋىمشە, قىتاي ۇكىمەتى 2020 جىلعا دەيىن كومىر ءوندىرىسىن 500 ملن. تونناعا دەيىن ازايتۋدى جوسپارلاپ وتىر. ولار ەكولوگياعا بايلانىستى وسىنداي شارالاردى قولعا الدى. سوندىقتان وسىنى ءالى دە زەردەلەۋ كەرەك", - دەپ اتاپ كورسەتتى ساعىنتاەۆ.
پرەمەر-مينيستر ماسەلەلەردى تالقىلاۋ قورىتىندىسى بويىنشا ءوزىنىڭ ءبىرىنشى ورىنباسارى ا. مامينگە اتالعان ماسەلەلەردى شەشۋ بويىنشا ۇسىنىستار ازىرلەپ, بۇل جۇمىستى جالپى ۇيلەستىرۋدى جۇزەگە اسىرۋدى تاپسىردى. سونداي-اق ب. ساعىنتاەۆ كومىر وندىرىلەتىن ورىنداردا ەكولوگيالىق قاۋىپسىزدىكتى قامتاماسىز ەتۋ ماسەلەسىنە نازار اۋدارۋ قاجەتتىگىن اتاپ ءوتتى.