قازاقستاندا ارەكەتسىز ۇكىمەتتىك ەمەس ۇيىمداردى جابۋ بويىنشا ءىرى جۇمىس باستاۋ الادى. بۇل تۋرالى بۇگىن ۇكىمەت وتىرىسىنىڭ قورىتىندىسى بويىنشا وتكەن ءباسپاسوز كونفەرەنتسياسىندا قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ ايتتى.
ءمينيستردىڭ ايتۋىنشا, قازىرگى تاڭدا ۇەۇ جۇيەسىندەگى كەمشىلىكتەردىڭ ءبىرى – تىركەلگەن ۇيىمداردىڭ شامامەن جارتىسىنىڭ ءىس جۇزىندە ارەكەتسىز ەكەنىندە. بۇل ەسەپكە الۋدا جاڭىلىسۋعا, كۇماندى اقپاراتتىڭ شىعۋىنا جانە ازاماتتار مەن ۇەۇ-دىڭ دۇرىس باعىتتان اداسۋىنا اكەلىپ سوعادى.
«سول سەبەپتى, ءبىزدىڭ الدىمىزدا وسى جۇيەنى رەتكە كەلتىرۋ مىندەتى تۇر. ول ءۇشىن ۇەۇ-دى قۇرۋعا اتسالىسقان ازاماتتار ولاردى جابۋ تۋرالى شەشىم قابىلداۋى كەرەك نەمەسە جۇمىس ىستەپ باستاۋى قاجەت. قازىر ءبىز ازاماتتار مەن ۇەۇ-عا ءتۇسىندىرۋ جۇمىستارىن بەلسەندى تۇردە جۇرگىزۋدەمىز, دەگەنمەن, ءوزىنىڭ ءارى قارايعى قىزمەتىنەن ءمان-ماعىنا كورمەيتىن ۇەۇ ءۇشىن ءبىز قارجى جانە ادىلەت مينيسترلىكتەرىمەن ولاردىڭ قانداي دا ءبىر جاۋاپكەرشىلىكسىز جابىلۋى ءۇشىن جۇمىستار اتقارۋدامىز», - دەدى ن. ەرمەكباەۆ.
سونداي-اق, مينيستر ۇەۇ-دىڭ دەرەكتەر بازاسى دا ۇلكەن وزگەرىستەرگە ۇشىرايتىنى تۋرالى ايتىپ ءوتتى.
«ءبىز قازىر ونى ەلەكتروندى فورماتقا اۋىستىرۋ جۇمىستارىن جۇرگىزۋدەمىز. بۇل تەحنيكالىق جانە باعدارلامالىق قامتاماسىز ەتۋدى تالاپ ەتەتىن كولەمدى جۇمىس», - دەدى ن. ەرمەكباەۆ.