قر ۇلتتىق بانكى «قازاقستاننىڭ حالىق بانكى» اق مەن «قازكوممەرتسبانكى» اق اراسىنداعى كەلىسسوزدەردىڭ باستالعاندىعى تۋرالى اقپاراتقا وراي پىكىر ءبىلدىردى, دەپ حابارلايدى قازاقپارات.
«ۇلتتىق بانك «قازاقستاننىڭ حالىق بانكى» اق مەن «قازكوممەرتسبانكى» اق اراسىنداعى كەلىسسوزدەردىڭ باستالعاندىعى تۋرالى بانكتەردىڭ مەندجمەنتى مەن اكتسيونەرى تارابىنان حابار الدى. قارجى نارىقتارىنداعى جاھاندانۋدىڭ جالعاسۋى جانە ينتەگراتسيالىق پروتسەستەردىڭ كۇشەيۋى جاعدايىندا بانك سەكتورىنىڭ شوعىرلانۋ تەندەنتسياسى كوپتەگەن ەلدەرگە, ونىڭ ىشىندە قازاقستانعا دا ءتان», - دەدى قر ۇب توراعاسىنىڭ ورىنباسارى ولەگ سمولياكوۆ.
ونىڭ ايتۋىنشا, مامىلە ناقتى جۇزەگە اسىرىلعانعا دەيىن بانكتەر ۇلتتىق بانكتىڭ كەلىسىمىن الۋى ءتيىس. بۇل رەتتە ۇلتتىق بانك بانكتەردىڭ بارلىق دەپوزيتتەرى مەن كرەديتورلارىنىڭ مۇددەلەرىن قورعاي الاتىن, سونىمەن بىرگە بانك بيزنەسىن تۇراقتى دامىتۋعا قارجىسى بار ءىرى اكتسيونەرلەرگە عانا كەلىسىم بەرەدى.
«سونداي-اق قازاقستاندىق زاڭناماعا سايكەس, «قازاقستاننىڭ حالىق بانكى» اق مەن «قازكوممەرتسبانكى» اق تالقىلاپ وتىرعان مامىلەنىڭ ۋاقىتشا شەكتەۋى جوق ەكەندىگىنە دە نازار اۋدارۋ قاجەت», - دەپ اتاپ ءوتتى سمولياكوۆ.