سەمەي قالاسىندا ەرتىستىڭ جاعاسىندا, قاراعايلى ورماننىڭ اراسىندا قاراعايلى اتالاتىن جاڭا ىقشاماۋدان سالىنىپ جاتىر. بۇل جەر الاشتىڭ رۋحاني استاناسى سانالاتىن سەمەيدىڭ ەڭ كورىكتى اۋدانى عانا ەمەس, قالاداعى بىرقاتار الەۋمەتتىك ماسەلەلەردى شەشۋگە باعىتتالعان, سەمەيلىكتەردىڭ سەيىل قۇراتىن, شىنىعاتىن, تىنىعاتىن, ءبىلىم الاتىن تاماشا ورىنعا اينالادى دەپ كۇتىلۋدە.
قاراعايلى ىقشاماۋدانىندا 64 توعىز قاباتتى, 7 ون ەكى قاباتتى جانە 10 جەتتى قاباتتى تۇرعىن ءۇي بوي كوتەرەدى دەپ جوسپارلانعان. بۇعان بىرنەشە الەۋمەتتىك جانە مادەني-سپورتتىق نىسانداردى قوسىڭىز. ولاردىڭ قاتارىندا الەمدىك ستاندارتتارعا ساي كەلەتىن, 5 مىڭ ادامعا شاقتالعان «اباي-ارەنا» سپورت كەشەنى, قازاق-تۇرىك ليتسەيى, مەديتسينا ۋنيۆەرسيتەتىنىڭ 7 جاتاقحاناسى مەن مۇگەدەكتەرگە ارنالعان وڭالتۋ ورتالىعىن ايتۋعا بولادى. كەلەشەكتە بۇل ىقشاماۋدانداعى تۇرعىندار سانى 18,1 مىڭ ادامدى قۇرايدى دەپ مەجەلەنىپ وتىر.
شىعىس قازاقستان وبلىسىنىڭ اكىمى دانيال احمەتوۆ سەمەيگە جاساعان جۇمىس ساپارى اياسىندا جاڭا ىقشاماۋداننىڭ باس جوسپارىمەن تانىستى.
-بىركەلكىلىكتەن بويدى اۋلاق سالۋ كەرەك. كەيبىر ۇيلەردى كىرپىشتەن, كەيبىر ۇيلەردى شىنىدان تۇرعىزعان ءلازىم. ەڭ باستىسى, جۇرتتىڭ كوڭىلىنەن شىعاتىنداي بولۋى قاجەت. بۇل سەمەيدىڭ تاريحىندا بۇرىن-سوڭدى بولماعان ەرەكشە ۇلگىدەگى, جاڭا تۇرپاتتاعى ىقشاماۋدان بولادى دەپ ويلايمىن, - دەدى دانيال احمەتوۆ.
ءبىر ايتا كەتەرلىگى, بيىل سەمەي قالاسىن اباتتاندىرۋعا ايرىقشا نازار اۋدارىلماق. شاھاردى اباتتاندىرۋ جۇمىستارىنا قالا بيۋدجەتىنەن 360 ميلليون تەڭگەدەن استام قارجى بولىنەدى. بۇل قاراجاتقا ەرتىس جاعالاۋىنان بولەك قابانباي باتىر الاڭى مەن مۇحتار اۋەزوۆ ەسكەرتكىشى وڭدەلىپ, جوندەلەتىن بولادى. قالا كوشەلەرىندەگى جولداردى جوندەۋگە قوسىمشا 1,1 ملرد تەڭگە بولىنەدى. وبلىس اكىمى دانيال احمەتوۆ سەمەيدىڭ جىلۋ جۇيەسىندەگى ولقىلىقتاردى رەتتەۋ ءۇشىن بيىل 3,4 ملرد. تەڭگە قاراجات قاراستىرىلاتىنىن جانە وسى ارقىلى جىلۋ ماسەلەسىن ءبىرجولا شەشۋدى جوسپارلاپ وتىرعانىن جەتكىزدى.
ازامات قاسىم, "ەگەمەن قازاقستان".
شىعىس قازاقستان وبلىسى.