2016 جىلى قازاقستاندا 5,6 مىڭ نازىك جاندى بۇزاقىلىق جاسادى, دەپ حابارلايدى قازاقپارات.
«ستاتيستيكالىق دەرەكتەردى تالداۋ كورسەتكەندەي, وتكەن جىلدا قازاقستان رەسپۋبليكاسى «اكىمشىلىك قۇقىقبۇزۋشىلىق تۋرالى» كودەكسىنىڭ 434 بابى بويىنشا (ۇساق بۇزاقىلىق) اكىمشىلىك جاۋاپكەرشىلىككە 65 201 ادام تارتىلدى, ونىڭ 5 609-ى - ايەلدەر», - دەلىنگەن قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت مالىمەتىندە.
كودەكستىڭ اتالعان بابى بويىنشا اكىمشىلىك جاۋاپكەرشىلىككە تارتىلعانداردىڭ نەگىزگى بولىگىن 30 بەن 40 جاس ارالىعىنداعىلار قۇرادى, ياعني 18 339 ادام جازالاندى. ودان كەيىنگى ورىندا 20 مەن 30 جاسقا دەيىنگىلەر تۇر - 17 647 ادام, 40 پەن 50 جاس اراسىنداعىلار - 14 432 ادام, سونداي-اق 11 446 ادام - 50 جاستان اسقان ازاماتتار.
انىقتالعانداي, 20 جاسقا دەيىنگى جاستار بۇل قۇقىقبۇزۋشىلىقتى سيرەك جاسايدى ەكەن. ولاردىڭ تاراپىنان 3 337 فاكتى تىركەلدى.
ايتا كەتەيىك, شەكىلدەۋىك قابىعىن, تەمەكى تۇقىلىن جانە باسقا دا قوقىستاردى تاستاۋ سياقتى قورشاعان ورتانى لاستاۋمەن بايلانىستى قۇقىقبۇزۋشىلىقتار ۇساق بۇزاقىلىق بولىپ ەسەپتەلەدى.