بۇگىن استانادا يپوتەكالىق قارىز الۋشىلارمەن كەزەكتى كەزدەسۋ وتكىزىلدى, ونىڭ بارىسىندا قازاقستان ۇلتتىق بانكىنىڭ وكىلدەرى قالالىق اكىمدىكپەن, قوعامدىق بىرلەستىكتەرمەن جانە بىرقاتار بانكتەرمەن بىرلەسىپ يپوتەكالىق قارىز الۋشىلاردىڭ پروبلەمالىق ماسەلەلەرىن جانە ولاردى شەشۋ جولدارىن تالقىلادى, دەپ جازادى ۇلتتىق بانكتىڭ رەسمي سايتى.
قارىز الۋشىلاردى يپوتەكالىق تۇرعىن ءۇي قارىزدارىن/يپوتەكالىق قارىزداردى قايتا قارجىلاندىرۋ باعدارلاماسى (بۇدان ءارى – باعدارلاما) شەڭبەرىندە بورىشتىق جۇكتەمەنى تومەندەتۋ, قارىزدى قايتا قارجىلاندىرۋ جانە جالعىز باسپانانى ساقتاۋ ماسەلەلەرى قىزىقتىردى.
قرۇب قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ جانە سىرتقى كوممۋنيكاتسيالار باسقارماسىنىڭ باستىعى الەكساندر تەرەنتەۆ حابارلاعانداي, قارىزداردى قايتا قارجىلاندىرۋ كەزەڭى 2017 جىلعى 1 ساۋىرگە دەيىن ۇزارتىلدى. ونىڭ ايتۋىنشا, بۇل باعدارلاما كاپيتالداندىرىلعان سومالاردى جىلدىق 3%-دان اسپايتىن مولشەرلەمە بويىنشا شەگەرگەندە قارىز بويىنشا نەگىزگى بورىشتى قايتا قارجىلاندىرۋدى, سونداي-اق شەتەل ۆاليۋتاسىنداعى قارىزداردى تەڭگەگە اۋىستىرۋدى كوزدەيدى. مەرزىمى 90 كۇننەن استام كەشىكتىرىلگەن پروبلەمالىق ۆاليۋتالىق قارىزدار قرۇب-نىڭ 2015 جىلعى 18 تامىزداعى رەسمي باعامى بويىنشا قايتا قارجىلاندىرىلۋعا جاتادى.
«سونداي-اق باعدارلامادا حالىقتىڭ الەۋمەتتىك وسال توپتارى (بۇدان ءارى – ءحاوت) ساناتىنا جاتاتىن قارىز الۋشىلاردى بانكتەر نەمەسە يپوتەكالىق ۇيىمدار قارىزدار بويىنشا سوتقا بەرىلگەن تالاپ ارىز بويىنشا تولەگەن مەملەكەتتىك باج سالىعىن وتەۋدەن بوساتۋ كوزدەلگەن. وعان قوسا, بانكتەردىڭ باعدارلاماعا قاتىسۋشىلاردان قايتا قارجىلاندىرىلاتىن قارىزعا بايلانىستى كوميسسيالاردى, الىمداردى جانە وزگە دە تولەمدەردى الۋعا قۇقىعى جوق», – دەپ حابارلادى ا. تەرەنتەۆ كەزدەسۋگە قاتىسۋشىلارعا.
ول سول سياقتى باعدارلاماعا 2016 جىلعى قىركۇيەكتە ەنگىزىلگەن وزگەرىستەر تۋرالى ايتىپ بەردى. اتاپ ايتقاندا, تۇرعىن ءۇي جانە جەر تەلىمى بويىنشا شەكتەۋلەردى الىپ تاستاۋ; جەر تەلىمىنىڭ نىسانالى باعىتىن الىپ تاستاۋ; ءحاوت ساناتىنداعى قارىز الۋشىلار ءۇشىن جالعىز جەر تەلىمىنىڭ بولۋىن الىپ تاستاۋ; باعدارلاماعا قايتا قارجىلاندىرۋعا ءوتىنىش بەرگەن كۇنى ءحاوت مارتەبەسىن راستاعان قارىز الۋشىلاردى, مىسالى, 2015 جىلعى 1 قاڭتاردان كەيىن مۇگەدەكتىك العان, زەينەتكەر بولعان قارىز الۋشىلاردى قوسۋ تۋرالى حابارلادى.
كەزدەسۋگە قاتىسقان قرۇب-نىڭ ورتالىق فيليالىنىڭ ديرەكتورى امىربەك سانقۇباەۆ تا بانكتەر باعدارلاما بويىنشا قابىلداعان, ماقۇلداعان جانە قايتا قارجىلاندىرعان وتىنىمدەر تۋرالى استانا قالاسى بويىنشا دەرەكتەردى ايتىپ بەردى. ماسەلەن, 2017 جىلعى 1 قاڭتاردا بانكتەر قارىزداردى قايتا قارجىلاندىرۋعا 22,4 ملرد. تەڭگە جالپى سومادا 2372 ءوتىنىمدى قارادى, ولاردان 13,2 ملرد. تەڭگە سوماداعى 1497 ءوتىنىم ماقۇلداندى.
كەزدەسۋ بارىسىندا قوعامدىق بىرلەستىكتەر «Investment Astana Group» اق جانە «اف يپوتەكا» اق قارىز الۋشىلارىنىڭ ماسەلەلەرىن شەشۋ جونىندەگى جۇمىس توبىن قۇرۋدى ۇسىندى, ولاردىڭ مۇلكى وسى كومپانيالاردىڭ بالانسىنا قابىلدانعان بولاتىن.
ۇلتتىق بانك پەن ەكىنشى دەڭگەيدەگى بانكتەردىڭ وكىلدەرىنىڭ كەزدەسۋ قورىتىندىسى بويىنشا ءاربىر قارىز الۋشىنىڭ جاعدايى جەكە تارتىپپەن قارالدى جانە ءتيىستى كونسۋلتاتسيا بەرىلدى.
باعدارلامانى ءتيىمدى ىسكە اسىرۋ ءۇشىن ۇلتتىق بانك قر ۇلتتىق ەكونوميكا مينيسترلىگىمەن, قر قارجى مينيسترلىگىمەن بىرلەسىپ 2027 جىلعا دەيىن قارىز الۋشى جەكە تۇلعالار مەن بانكتەردى باعدارلاما شەڭبەرىندە تۋىندايتىن سالىقتاردى تولەۋدەن بوساتۋ جونىندەگى جۇمىستى جۇرگىزگەندىگىن اتاپ وتەمىز. سونداي-اق بانكتەرگە باعدارلامانىڭ ىسكە اسىرىلۋى كەزەڭىندە قارىز الۋشىلاردى جالعىز باسپاناسىنان شىعارۋدى توقتاتا تۇرۋ تۋرالى حاتتار جىبەرىلدى, جەرگىلىكتى اتقارۋشى ورگاندارمەن بىرلەسىپ جۇمىس ىستەمەيتىن قارىز الۋشىلار مەن ولاردىڭ وتباسى مۇشەلەرىن جۇمىسقا ورنالاستىرۋ ماسەلەلەرى شەشىلۋدە, بانكتەرمەن قازىرگى ۋاقىتتا كرەديتورلار الدىنداعى مىندەتتەمەلەرىن تولىق كولەمدە ورىنداۋعا مۇمكىندىگى جوق قارىز الۋشىلاردىڭ قارىزدارىن وتەۋىنىڭ وڭتايلى نۇسقالارىن ۇسىنۋ جونىندەگى ۋاعدالاستىققا قول جەتكىزىلۋدە.