2016 جىلى ءتۇرلى اكىمشىلىك قۇقىق بۇزۋشىلىقتار ءۇشىن 2,9 ملن. ادامعا ايىپپۇل سالىندى, دەپ حابارلايدى قازاقپارات.
«بۇدان بولەك, 940 مىڭعا جۋىق قۇقىق بۇزۋشىلار وزگە دە جازا تۇرلەرىنە تارتىلدى, ياعني 803 403 - ەسكەرتۋ, 75 197 - اكىمشىلىك قاماققا الۋ, سونىمەن قاتار 52 662 ادامعا قاتىستى جۇرگىزۋشىلىك كۋالىگىنەن ايىرۋ شارالارى قولدانىلدى»,-دەپ اتاپ وتىلگەن قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت مالىمەتىندە.
جاساعان ارەكەتتەرى ءۇشىن قۇقىق بۇزۋشىلار سالىنعان ايىپپۇلداردىڭ 64,2 پايىزىن, ياعني 41,3 ملرد. تەڭگەنى مەملەكەت پايداسىنا وتەگەن. ودان باسقا, وتكەن جىلدارداعى قۇقىق بۇزۋشىلىلاردان مەملەكەتتىك بيۋدجەتكە 8,7 ملرد. ايىپپۇل وندىرىلگەن. اكىمشىلىك ءوندىرىستىڭ قىسقارتىلعان ءتارتىبى بويىنشا 50 پايىز جەڭىلدىكپەن العاشقى 7 تاۋلىك ىشىندە تولەنەتىن اكىمشىلىك ايىپپۇلدار قۇقىق بۇزۋشىلاردىڭ 8,6 ملرد. تەڭگەسىن ۇنەمدەگەن كورىنەدى. انىقتالعانداي, بەلگىلەنگەن جىلدامدىقتى اسىرعانى ءۇشىن - 247 096 جۇرگىزۋشى, ماس كۇيىندە كولىكتى باسقارعانى ءۇشىن - 35 417, سونداي-اق قوعامدىق ورىنداردا ماس كۇيىندە ۇستالعان - 193 113 ادام, جەكەلەگەن قوعامدىق ورىنداردا تەمەكى تارتقانى ءۇشىن 120 957 ادام جاۋاپكەرشىلىككە تارتىلدى.