استانا قالالىق تۇرعىن ءۇي ينسپەكتسياسى باسقارماسى 1950-1999 جىلى سالىنعان تەحنيكالىق تەكسەرۋدى تالاپ ەتەتىن ۇيلەردىڭ ءتىزىمىن جاسادى. بۇل ساناتقا كىرگەن نىساندار سانى 1 416 (جالپى اۋدانى 3 ملن 120 مىڭ شارشى مەتر). بۇل تۋرالى ەلوردالىق تۇرعىن ءۇي ينسپەكتسياسى جەتەكشىسى ءاليحان قۋاتبەكوۆ مالىمدەدى, دەپ جازادى krisha.kz.
ونىڭ ايتۋىنشا, قازىرگى تاڭدا 537 ۇيگە تەكسەرۋ جۇرگىزىلىپ, ولاردىڭ 372-ءسى اپاتتى جاعدايدا دەپ تانىلدى. العاشقى 228 نىسان جىل سوڭىنا دەيىن سۇرىلەدى. قالعان 144 ءۇي 2017-2020 جىلدار ارالىعىندا سۇرىلمەك.
ايتا كەتۋ كەرەك, ەلوردالىق بيلىك اتالعان شارانى اتقارۋدا قارجىلاندىرۋدىڭ جەتىسپەۋىنەن كەيىنگە شەگەرىپ كەلەدى. سونىمەن قاتار, اكىمدىكتىڭ اپاتتى دەپ شەشكەن ۇيلەرىن سۇرۋگە تۇرعىندار دا كەلىسپەۋشىلىكتەرىن بىلدىرۋدە.
الداعى ۋاقىتتا ەلوردادا اۋدان اكىمدىكتەرىنىڭ ەسەپ بەرۋ كەزدەسۋلەرى وتكىزىلىپ, ماسەلە تالقىعا سالىنادى. اپاتتى ۇيلەردىڭ ءتىزىمىن مىنا سىلتەمەدەن كورۋگە بولادى.