كاسىپكەرلىك وبەكتىلەرىن تەكسەرۋ 3 ەسە قىسقاردى. بۇل جونىندە قر ۇلتتىق ەكونوميكا مينيسترلىگىنىڭ تۇتىنۋشىلاردىڭ قۇقىعىن قورعاۋ كوميتەتى توراعاسىنىڭ ورىنباسارى, قر مەملەكەتتىك سانيتاريالىق باس دارىگەرى جانداربەك بەكشين قر باس پروكۋراتۋراسىندا وتكەن كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل جاساۋ جونىندەگى كەڭەس وتىرىسىندا مالىمدەدى.
«كاسىپكەرلىك وبەكتىلەرىن تەكسەرۋ 3 ەسە قىسقاردى. 2014 جىلى ءاربىر سالا بويىنشا 112 تەكسەرۋ پاراعى بولدى. 2015 جىلى 1 كەشەندى تەكسەرۋگە قىسقارتۋ ۇسىنىلدى. 2016 جىلى ولاردى 45 تەكسەرۋگە دەيىن قايتا كوبەيتۋ ۇسىنىلدى. ياعني ءبىز تەكسەرۋ پاراقتارىن جىل سايىن وزگەرتىپ وتىرامىز. الايدا, ولارداعى تالاپتار سانيتاريالىق قاعيدالار مەن نورمالاردان الىنادى, تەكسەرۋ پاراقتارىنان تىس ەشقانداي باقىلاۋ جۇرگىزىلمەيدى. وسىعان ەرەكشە نازار اۋدارۋ قاجەت دەپ سانايمىن», - دەپ مالىمدەدى ج.بەكشين.
ەلىمىزدىڭ باس دارىگەرىنىڭ ايتۋى بويىنشا, كامەرالدىق باقىلاۋدى ەنگىزۋدىڭ, ءونىمدى ىرىكتەۋدىڭ ارقاسىندا تاماق ءونىمىنىڭ قاۋىپسىزدىگىن بيزنەسكە اسەر ەتپەي باقىلاۋعا مۇمكىندىك بەرەدى.
مەملەكەتتىك دارىگەر اتاپ وتكەندەي, تەكسەرۋ پاراقتارى, سانيتاريالىق قاعيدالار مەن نورمالار «اتامەكەن» ۇكپ-مەن جانە قر ۇەم-دە تىركەلگەن 30 قاۋىمداستىقپەن كەلىسىلىپ وتىرعان.
«ءبىز وسىنىڭ بارلىعىن بىرلەسىپ جاسادىق. الايدا, ۋاقىت وتە كەلە, تاماق ءونىمى وندىرىسىندە نانوتەحنولوگيالار پايدا بولۋدا. ارينە, ءبىز ءنانوونىمدى باقىلاۋ جونىندەگى سانيتاريالىق قاعيدالاردى عىلىمي تۇردە قاراستىراتىن بولامىز», - دەدى ج.بەكشين.