سالىقتىق تەكسەرۋ ەرەجەلەرىن وزگەرتۋ ۇسىنىلدى

ءماجىلىس دەپۋتاتتارى بيزنەسكە قاتىستى قوسىمشا سالىقتىق تەكسەرۋ ەرەجەلەرىن وزگەرتۋ قاجەت دەيدى. بۇل تۋرالى palata.kz جازادى. تومەنگى پالاتا وكىلدەرى قازاقستان ۇكىمەتىنە سالىق داۋلارىنا قاتىستى, جالپى بەكىتىلگەن 3 جىلدىق تالاپ قويۋ مەرزىمىن بەكىتۋ تۋرالى ۇسىنىس جاسادى. مۇنداي دەپۋتاتتىق ساۋالدى, بۇگىن, قازاقستان رەسپۋبليكاسى پرەمەر-ءمينيسترى باقىتجان ساعىنتاەۆقا دەپۋتات مەرۋەرت قازبەكوۆا جولدادى. اتالعان ۇسىنىستىڭ تۋىنا بىردەن-ءبىر سەبەپ بولعان جاعداي – «سالىق ماسەلەلەرىنە ارنالعان ۇكىمەت ساعاتى بارىسىندا ۇەم باسشىلىعىمەن ارادا ورىن العان پىكىرتالاس» (وتىرىس بيىلعى جىلدىڭ 16 قاڭتارىندا ءوتتى – اۆت.), دەپ توقتالدى ماجىلىسمەن. دەپۋتات, ءوز كەزەگىندە, سالىق كودەكسىنىڭ 46 بابىنا سايكەس, سالىققا قاتىستى تالاپ قويۋ مەرزىمى 5 جىلدى قۇرايتىنىن اتاپ ءوتتى. «سالىق ورگاندارى ۇزدىكسىز جۇرگىزىپ وتىراتىن تەكسەرىستەردەن كەيىن دە, كاسىپكەر ءوزىن جايلى سەزىنە المايدى. سەبەبى, وسىدان 5 جىل بۇرىن بىرنەشە رەت ماقۇلدانعان ەسەبىندە نەمەسە 5 جىل بۇرىن كەلىسىمشارت جاساسقان, بۇرىنعى سەرىكتەسىنە قاتىستى قانداي دا ءبىر زاڭبۇزۋشىلىق ورىن الماسىنا كىم كەپىل؟ ال, كاسىپكەر وسىنىڭ سالدارىنان تاعى دا قوسىمشا سالىقپەن قاتار, 5 جىل بويى ايىپپۇل مەن وسىماقى تولەۋگە ءماجبۇر بولماق», – دەپ اتاپ ءوتتى پلەنارلىق وتىرىستا مەرۋەرت قازبەكوۆا. دەپۋتات, سونىمەن قاتار, سالىققا قاتىستى تالاپ قويۋ مەرزىمى «وسى قالپىندا» ساقتالاتىن بولسا, «ماسەلەنىڭ ورىن الۋىنا دەيىنگى ايىپپۇلدار مەن وسىماقى سوماسى, وسىعان دەيىنگى تولەنگەن سالىق سوماسىنا تەڭ بولاتىنىن, سول كەزدە ءتىپتى, «سالىقتى ەكى ەسە ەمەس, ءۇش ەسەگە تولەۋگە» تۋرا كەلەتىنىن» تىلگە تيەك ەتتى. «بۇل بيزنەسكە قازىنالىق تۇرعىدان قىسىم جاساپ, كەي جاعدايدا, ءتىپتى, كاسىپورىننىڭ جابىلىپ, ازاماتتاردىڭ جۇمىسسىز قالۋىنا اكەپ سوقتىرادى», – دەپ ءوز پىكىرىمەن ءبولىستى پارلامەنت مۇشەسى. بۇدان بولەك, دەپۋتاتتىق ساۋال اۆتورى, سالىق زاڭدارىنا دا باسا نازار اۋداردى. ول ءوز كەزەگىندە, «وتاندىق كاسىپكەرلەردىڭ ەۋرازيالىق ەكونوميكالىق وداق كولەمىندەگى باسەكەلەستەرىنە, سالىققا قاتىستى تالاپ قويۋ مەرزىمى جەڭىلدەتىلگەنىن» ايتتى. «ماسەلەن, رەسەي فەدەراتسياسى سالىق كودەكسىنىڭ 113 بابىنا سايكەس, سالىققا قاتىستى تالاپ قويۋ مەرزىمى 3 جىلدى قۇرايدى جانە بۇل زاڭمەن بەكىتىلگەن ەرەجە. ال, كەي جاعدايدا, كاسىپكەردىڭ قالاۋىمەن, مىسالى, ققس قايتارعان كەزدە, 5 جىلدىق مەرزىم دە قولدانىلادى. وسى ارقىلى رەسەي فەدەراتسياسى كاسىپكەرلەرىنە, قازاقستانداعى ارىپتەستەرىنە قاراعاندا, الدەقايدا قولايلى جاعدايلار جاسالعان», – دەپ توقتالىپ ءوتتى مەرۋەرت قازبەكوۆا. دەپۋتات, سونداي-اق, ۇكىمەت ساعاتى بارىسىندا, «قارجى مينيسترلىگىنىڭ سالىق داۋلارىنا قاتىستى تالاپ قويۋ مەرزىمىن 5 جىلدان 3 جىلعا قىسقارتۋدان باس تارتۋى, وتاندىق بيزنەس-قوعامداستىق تاراپىنان تۇسىنىسپەۋشىلىك تۋدىرىپ وتىرعانىن» مالىمدەدى. سونىمەن قاتار, دەپۋتات, سالىق داۋلارىنا قاتىستى 3 جىلدىق تالاپ قويۋ مەرزىمىن بەكىتۋگە جونىندە تاعى ءبىر ۇسىنىسىن ورتاعا سالدى. «ال, سالىق تولەۋشىنىڭ ءوزى, مىسالى, ققس قايتارعان ۋاقىتتا ۇزاق مەرزىمگە تەكسەرتۋ جۇرگىزۋ تۋرالى ءوتىنىش بىلدىرگەن جاعدايدا, ولارعا ونداي قۇقىق بەرۋگە بولادى. بىراق ول مىندەتتى تۇردە, سالىق ورگاندارى تاراپىنان ەمەس, كاسىپكەر تاراپىنان ۇسىنىلۋى ءتيىس», – دەپ قورىتىندىلادى دەپۋتات.