«قاراعاندى قالاسىنىڭ حالىقتى جۇمىسپەن قامتۋ ورتالىعى» كوممۋنالدىق مەملەكەتتىك مەكەمەسى WhatsApp موبيلدىك قوسىمشاسى ارقىلى جۇمىس قاراستىرۋ بويىنشا جاڭا الەۋمەتتىك جوبانى ىسكە قوسقانىنا بەس ايدان استى. اسا كوپ ۋاقىت وتە قويماسا دا, بۇل جوبا تاماشا ناتيجەلەرگە قول جەتكىزىپ, كوپشىلىكتىڭ ىقىلاسىنا بولەنىپ ۇلگەردى.
بۇگىنگە دەيىن وسى باستاما شەڭبەرىندە ارنايى قوسىلعان جەلىگە جۇمىسقا تۇرۋ ماسەلەسىمەن قالانىڭ 2400-دەن استام تۇرعىنى حابارلاسىپ, سونىڭ 400-گە جۋىعى جاڭا جۇمىسپەن قامتىلعان ەكەن. سونىڭ ىشىندە وتىز شاقتى ادام جاستار تاجىريبەسىنەن وتۋگە, قىرىق شاقتى ادام الەۋمەتتىك جۇمىس ورىندارىنا جانە 15 ادام قوعامدىق جۇمىستارعا جولداما العان. قول قۋسىرىپ ۇيدە وتىرعاننان بۇل الدەقايدا ءتيىمدى دە پايدالى ەمەس پە.
WhatsApp جەلىسى بويىنشا جۇمىس ىزدەگەندەردىڭ ءبىرى ولگا انيسيموۆاعا جۇمىسپەن قامتۋ ورتالىعى قاراعاندىنىڭ №39 مەكتەپ-بالاباقشا كەشەنىنە بارىپ, اڭگىمەلەسۋ سىنىنان وتۋگە كەڭەس بەرگەن ەكەن. ونىڭ جولى بولىپ, بۇگىندە سول مەكتەپتە اقپاراتتانۋ ءپانىنىڭ مۇعالىمى قىزمەتىن اتقارۋدا.
جاڭا مامان نەمەسە بوس جۇمىس ورنىنا قىزمەتكەر ىزدەگەن مەكەمەلەر دە موبيلدىك قىزمەتكە جيىرەك حابارلاساتىن بولعان. سولاردىڭ ءبىرى قاراعاندىداعى №3 پەرزەنتحانانىڭ باسشىلىعى دا جۇمىسپەن قامتۋ ورتالىعىنا WhatsApp جەلىسى ارقىلى حابارلاسىپ, وزدەرى وتە قاجەت ەتىپ وتىرعان اكۋشەر مامانداردى وڭاي تاپقان.
بوس جۇمىس ورىندارى ۇلكەن قالالاردا بارشىلىق. تەك جۇمىس بەرۋشى مەن جۇمىس ىزدەۋشى ءبىرىن-ءبىرى تاپپاي جاتادى. ايتالىق, قاراعاندىنىڭ 132 مەكەمەسىندە وسى كۇندەرى 998 بوس جۇمىس ورنى بار ەكەن.
WhatsApp قوسىمشاسى ارقىلى الەۋمەتتىك نەمەسە كاسىپتىك باعدار بويىنشا اقىل سۇراپ حابارلاساتىندار دا جەتەرلىك. ولاردىڭ بارىنە ساۋالىنا قاراي مەيلىنشە پايدالى كەڭەستەر بەرىلەدى. جۇمىس تاپقان سوڭ جوعالىپ كەتپەي, العىسىن جاۋدىرا قايتا حابارلاساتىن جاندار جاڭا جوبانىڭ قانشالىقتى پايدا اكەلىپ وتىرعانىنان حابار بەرسە كەرەك.
قايرات ءابىلدينوۆ,
«ەگەمەن قازاقستان»
قاراعاندى