8 قاڭتار كۇنى تاڭ الدىندا شىمكەنت قالاسىنىڭ ورتالىعىنداعى ۇيلەردىڭ ءبىرىندە قايعىلى جاعداي ورىن الدى. كوگىلدىر وتىن مەن اۋا قوسىندىسىنان باراك ىسپەتتەس سالىنعان قوس قاباتتى ءۇي جارىلىپ, وسىندا تۇرىپ جاتقان ەكى وتباسى ءۇيىندى استىندا قالدى.
وقيعا ورنىنا باردىق. نەگىزگى تۇرعىن ۇيگە جاپسارلاس سالىنعان ەكى قاباتتى پاتەر قام كىرپىشتەن كوتەرىلگەن. ءبىزدىڭ انىقتاعانىمىز, ەرلى-زايىپتى زەينەتكەرلەر بۇل باسپانانى ەكى وتباسىنا جالعا بەرگەن. پاتەر جالداپ تۇرىپ جاتقان اسكەري قىزمەتكەر داۋرەن جۇماليەۆ قىزىلوردا وبلىسىنداعى قازالى اۋدانىنىڭ تۋماسى ەكەن. جارىلىس سالدارىنان ونىڭ زايىبى ءسابينا ورىنباەۆا قايتىس بولعان. ءبىر جاستان ەندى اسقان قىزى ارۋجانعا دارىگەرلەر ميى ازداپ شايقالعان دەگەن دياگنوز قويىپ وتىر. ارۋجاندى اسا اۋىر جاراقاتتان (اجالدان دەۋگە اۋىز بارمايدى) بەسىك قۇتقارىپ قالعان.
ال ونىڭ اجەسى ءاليا ورىنباەۆا جەدەل جاردەم اۋرۋحاناسىندا جاساندى اپپاراتپەن دەم الىپ جاتىر. دارىگەرلەر ونىڭ ەزىلگەن كوك باۋىرىن وپەراتسيا جاساپ الىپ تاستاعان. جالدامالى پاتەردىڭ ەكىنشى يەسى 21 جاستاعى قارلىعاش احانوۆانىڭ دەنەسىن كۇيىك شالىپ, اۋرۋحاناعا تۇسكەن. ماماندار جارىلىستىڭ ورىن الۋ سەبەبىن پليتا مەن يراندىق كامينگە كوگىلدىر وتىن دۇرىس قوسىلماعاننىڭ سالدارى دەپ وتىر.
پاتەر يەسى امانبەك ساۋىرباەۆتىڭ ايتۋىنشا, جىلۋ قازاندىعى ءوز ۇيىندە بولعان. ال جاپسارلاس سالىنعان ۇيگە 3 مەترلىك شلانگامەن ەكى كامفوركالى گاز بەن كامينگە كوگىلدىر وتىن تارتىلعان. شلانگا دۇرىس بەكىتىلمەگەندىكتەن, كوگىلدىر وتىن اۋا قوسىندىسىمەن جيناقتالا كەلە, جارىلعان. بۇل العاشقى انىقتاۋلار عانا.
وبلىس اكىمى جانسەيىت تۇيمەباەۆ وقيعا ورنىنا ارنايى كەلىپ, زارداپ شەككەندەرگە كومەك كورسەتۋدى ءتيىستى ورىندارعا تاپسىردى. وقيعا بولعان كۇنى-اق اكىمدىك تاراپىنان قۇرىلعان كوميسسيا جۇمىس جاساپ جاتىر. قازىرگى كەزدە زارداپ شەككەن وتباسىلارعا الەۋمەتتىك كومەك كورسەتۋ ماقساتىندا ارنايى كوميسسيا قۇرىلىپ, زەردەلەۋ جۇمىستارى جۇرگىزىلۋدە. ءسويتىپ, وقىس وقيعادان زارداپ تارتقان وتباسىلارعا جەرگىلىكتى بيۋدجەت ەسەبىنەن 100 ايلىق ەسەپتىك كورسەتكىش مولشەرىندە قارجىلاي كومەك بەرىلىپ, ۋاقىتشا تۇرۋ باسپاناسى سىندى قوسىمشا الەۋمەتتىك قورعاۋ شارالارى قاراستىرىلىپ جاتىر. سونداي-اق, قايتىس بولعان وتباسىنا ءتيىستى ماتەريالدىق كومەك پەن ءتيىستى قۇرىلىمداردىڭ ۇيىمداستىرۋىمەن قاجەتتى دەمەۋشىلىك كومەكتەر بەرىلۋدە.
وقيعا ورنىندا بولعان وبلىس اكىمى الداعى ۋاقىتتا ازاماتتاردى تۇراقتى جانە ۋاقىتشا تىركەۋگە قاتىستى زاڭعا ەنگىزىلگەن وزگەرىستەرگە وراي جۇرگىزىلەتىن تىركەۋ جۇمىستارى كەزىندە جەكە باسپاناسى جوق ازاماتتار سانىن انىقتاپ, سول ارقىلى اپاتتى ۇيلەردى تۇگەندەۋ جۇمىستارىن جۇرگىزۋدى تاپسىردى.
اپاتتى وقيعا كەزىندە اۆاريالىق-قۇتقارۋ جۇمىستارىنا وڭتۇستىك قازاقستان وبلىستىق توتەنشە جاعدايلار دەپارتامەنتىنەن 23 ادام جانە 3 تەحنيكا, جەدەل-قۇتقارۋ جاساعىنىڭ 44 قىزمەتكەرى مەن 6 تەحنيكاسى (ونىڭ ىشىندە 3 قىزمەتتىك يتىمەن 3 كينولوگيالىق ەسەپ, 1 مەديتسينالىق-پسيحولوگيالىق قىزمەت), ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ 17 مامانى, 4 تەحنيكا, مەديتسينالىق اپاتتار ورتالىعىنىڭ 3 قىزمەتكەرى مەن قۇرامىندا 16 ادام جانە 4 تەحنيكاسى بار جەدەل مەديتسينالىق قىزمەت وكىلدەرى تارتىلدى.
سونىمەن قاتار, وسى كۇنى وقو ىشكى ىستەر دەپارتامەنتىنىڭ 30 قىزمەتكەرى وقيعا ورنىندا قورشاۋ جۇمىستارىن قامتاماسىز ەتىپ, ەنەرگەتيكا جانە گاز شارۋاشىلىعى قىزمەتىنىڭ 4 قىزمەتكەرى ەلەكتر قۋاتىن جانە گازدى اجىراتۋ جۇمىستارىن جۇرگىزدى.
ءبىز وقيعا ورنىنا كەلگەن «قازترانسايماق» اق باس ينجەنەرى ساكەن يسمايلوۆتان وسى وقىس وقيعاعا تۇسىنىك بەرۋىن وتىنگەن ەدىك.
– كوميسسيا قۇرىلىپ, تەكسەرۋ جۇمىستارى ءجۇرىپ جاتقاندىقتان, ازىرگە باعا بەرۋ قيىن, – دەدى ول. – زاڭ بويىنشا, ءۇي ىشىنە ورناتىلعان گاز قوندىرعىسى تۇرعىن ءۇي يەسىنىڭ جاۋاپكەرشىلىگىندە بولادى. ءبىزدىڭ شتاتتا پاتەرلەردىڭ تەحنيكالىق قاۋىپسىزدىك شارالارىن تەكسەرەتىن ينسپەكتسيا جوق. ءۇي يەلەرى جىلىتۋ ماۋسىمى الدىندا ءتيىستى مەكەمەلەرمەن كەلىسىمشارتقا وتىرادى. ولار – كوگىلدىر وتىنعا قاتىسى جوق كولدەنەڭ كوك اتتىلار ەمەس, مامانداندىرىلعان, ارناۋلى ورىنداردان اتتەستاتتاۋدان وتكەن, قۇزىرەتتى ورگانداردىڭ ەسەبىندە تۇرعان مەكەمەلەر. اپات ورىن العان ءۇيدىڭ تەحنيكالىق قۇجاتتارىن الىپ, زەردەلەۋ جۇمىستارىن جۇرگىزەمىز. ولار قۇجاتىمىز تۇگەل دەگەنىمەن, ءالى ەشقانداي قاعازىن وتكىزبەدى. اكىمدىك ءۇش جاقتى كوميسسيا قۇردى. ولار بارلىق ۇيلەرگە تەكسەرۋ جۇمىستارىن جۇرگىزەدى. كوگىلدىر وتىن دۇرىس قوسىلماعان ۇيلەر اجىراتىلادى. مۇنىڭ تاعى دا وسىنداي قايعىلى وقيعالار ورىن الماۋى ءۇشىن ىستەلىپ جاتقان امال ەكەنىن تۇسىنەرسىزدەر.
اپاتتىڭ سالدارى وسىنداي بولدى. ەكى بىردەي وتباسىنىڭ باسىنا اۋىرتپاشىلىق ءتۇستى. جاس ءسابيى بار انا دۇنيەدەن ءوتتى. ونىڭ ورنىن تولتىرۋ, ارينە, قيىن. «قايعىنى بولىسسە ازايادى» دەيدى دانا حالقىمىز. ءبىز وقيعا ورنىنان اكىمدىك قىزمەتكەرلەرىنەن بولەك, قيىندىقتا قالعان ەكى وتباسىنا قايىرىمدىلىق كومەگىن ۇسىنىپ جاتقان ازاماتتاردى كوپ كوردىك.
ال اپاتتىڭ قانداي جاعدايدا ورىن العاندىعىن وسى ماقساتتا قۇرىلعان ارنايى كوميسسيا ناقتى انىقتايتىن بولادى.
وڭتۇستىك قازاقستان وبلىسى
باقتيار تايجان,
«ەگەمەن قازاقستان»
سۋرەتتى تۇسىرگەن
قايسار شەرىم