كەشە سەناتتىڭ كەزەكتى جالپى وتىرىسىندا پالاتا توراعاسى قاسىم-جومارت توقاەۆ بارشا قازاقستاندىقتاردى ۇلىستىڭ ۇلى كۇنى – ناۋرىز مەرەكەسىمەن قۇتتىقتاي وتىرىپ, اتالعان مەرەكەنىڭ تاۋەلسىزدىكتىڭ ارقاسىندا جاڭا سيپاتقا يە بولعاندىعىن ەرەكشە اتاپ ءوتتى.
كۇن تارتىبىنە سايكەس دەپۋتاتتار «1992 جىلعى 23-25 قاراشادا كوپەنگاگەندە قابىلدانعان وزون قاباتىن بۇزاتىن زاتتار جونىندەگى مونرەال حاتتاماسىنا تۇزەتۋدى ءجانە 1997 جىلعى 15-17 قىركۇيەكتە مونرەالدا قابىلدانعان وزون قاباتىن بۇزاتىن زاتتار ءجونىندەگى مونرەال حاتتاماسىنا تۇزەتۋدى راتيفيكاتسيالاۋ تۋرالى» زاڭ جوباسىن تالقىلادى. اتى ايتىپ تۇرعانداي, زاڭدىق قۇجاتتى قابىلداۋ ەلىمىز كاسىپورىندارىنا قارجىلىق جانە تەحنيكالىق كومەك الۋعا, بالاما جانە نەعۇرلىم قاۋىپسىز تەحنولوگيالارعا كوشۋ كەزىندە شىعىنداردى ازايتۋعا ءمۇمكىندىك بەرەدى. سەناتورلار قورشاعان ورتانى قورعاۋ ءمينيسترى نۇرعالي ءاشىموۆ تانىستىرعان زاڭ جوباسىن ءبىراۋىزدان قابىلدادى.
جالپى وتىرىس بارىسىندا سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رۇقسات بەرۋ جۇيەسىن جەتىلدىرۋ ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. اتالعان زاڭ جوباسى 5 كودەكس پەن 52 زاڭعا وزگەرىستەر مەن تولىقتىرۋلار ەنگىزۋدى كوزدەيدى. بۇدان باسقا سەنات «ليتسەنزيالاۋ تۋرالى», «ەتيل ءسپيرتى جانە الكوگول ءونىمىنىڭ ءوندىرىلۋى جانە اينالىمىن مەملەكەتتىك رەتتەۋ تۋرالى», «تۇرعىن ءۇي قۇرىلىسىنا ۇلەستىك قاتىسۋ تۋرالى», «جانۋارلار ءدۇنيەسىن قورعاۋ, ءوسىمىن مولايتۋ ءجانە پايدالانۋ تۋرالى» جانە «قازاقستان رەسپۋبليكاسىنداعى ءساۋلەت, قالا قۇرىلىسى جانە قۇرىلىس قىزمەتى تۋرالى» زاڭدارعا ءتيىستى وزگەرىستەر ەنگىزۋدى ۇسىندى. تالقىلاۋ ناتيجەسى بويىنشا زاڭ جوباسى سەنات ەنگىزگەن وزگەرىستەر جانە تولىقتىرۋلارىمەن پارلامەنت ءماجىلىسىنە جىبەرىلدى.
وتىرىس سوڭىنان بۇۇ باس حاتشىسىنىڭ ورىنباسارى ءارى اتالعان ۇيىمنىڭ جەنەۆاداعى ورتالىعىنىڭ ديرەكتورى بولىپ تاعايىندالعان قاسىم-جومارت توقاەۆ وسى ءجۇيەدەگى جوعارى لاۋازىمىنا قاتىستى بۇقارالىق اقپارات قۇرالدارى وكىلدەرىنە تۇسىنىك بەردى. بۇل لاۋازىمعا بىلىكتى ديپلوماتتى ەلباسى ن.نازارباەۆ ءوزىنىڭ بۇۇ باس حاتشىسىمەن كەلىسسوز بارىسىندا ۇسىنعان-دى. ەگەر مەملەكەت باسشىسىنىڭ مۇنداي بەدەلى بولماعاندا, ءتيىستى شەشىم قابىلدانباس تا ەدى, دەگەن ويىن بىلدىرگەن سەنات ءتوراعاسى بۇل, سونىمەن قاتار, قازاقستاننىڭ حالىقارالىق ارەناداعى بەدەلىنىڭ ءوسىپ وتىرعاندىعىن ايعاقتايتىنىن ايتتى. سونداي-اق, ەلباسىنىڭ 2010 جىلى وتكەن يادرولىق قارۋسىزدانۋ جانە تاراتپاۋ ءجونىندەگى جاھاندىق سامميتكە قاتىسۋى, ماڭىزدى دا تارتىمدى ويلاردى ورتاعا سالۋى قازاقستاننىڭ بۇل سالاداعى ايتارلىقتاي جەتىستىكتەرىن پاش ەتتى. قاسىم-جومارت توقاەۆ وسىنىڭ بارلىعى ونىڭ بۇۇ جۇيەسىندەگى جوعارى لاۋازىمعا تاعايىندالۋىنا سەبەپشى بولعاندىعىن باسا ايتىپ ءوتتى.
اسقار تۇراپباي ۇلى.