16 ناۋرىزدا ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ قازاقستاندىق جانە شەتەلدىك بۇقارالىق اقپارات قۇرالدارىنىڭ وكىلدەرىمەن بريفينگ وتكىزىپ, قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىن وتكىزۋگە دايىندىق بارىسىمەن تانىستىردى.
وسك توراعاسىنىڭ حاباردار ەتكەنىندەي, سايلاۋشىلار ءتىزىمىن جاساۋ – سايلاۋ كوميسسيالارىنىڭ ماڭىزدى مىندەتتەرىنىڭ ءبىرى. بۇل شارا جىل بويى جۇرگىزىلەدى. جىل ورتاسىندا جانە جىل سوڭىندا جەرگىلىكتى اتقارۋشى ورگانداردان سايلاۋشىلاردىڭ تىزىمدەرى الىنعان. سايلاۋ كۇنى تاعايىندالعان سوڭ, سايلاۋشىلاردىڭ ءتىزىمىن ناقتىلاۋ بويىنشا جۇمىستار ءجۇرگىزىلدى. بۇگىندە ەلىمىزدە كوشى-قون ۇدەرىستەرى بەلسەندى ءجۇرىپ جاتىر. استانا مەن الماتىدا جاڭا ۇيلەر سالىنۋدا. سوندىقتان سايلاۋشىلار ءتىزىمىن جاساۋعا باسا نازار اۋدارىلىپ وتىر. 13 ناۋرىزدا جەرگىلىكتى اتقارۋشى ورگاندار cايلاۋشىلار تىزىمدەرىن سايلاۋ كوميسسيالارىنا جولدادى. وسىعان بايلانىستى ەلىمىزدىڭ ءاربىر تۇرعىنى 18 ناۋرىزدان باستاپ سايلاۋشىلار تىزىمىمەن تانىسا الادى.
ورتالىق سايلاۋ كوميسسياسىنىڭ باسشىسى 19 ناۋرىزدا ەلىمىزدىڭ بارلىق ءوڭىرلەرىندە سايلاۋدى ۇيىمداستىرۋشىلارمەن سەمينار-كەڭەستەر وتكىزۋ شارالارى اياقتالاتىنىنا دا توقتالدى. وسىعان دەيىن وسك استانادا رەسپۋبليكالىق سەمينار-كەڭەس ۇيىمداستىردى, دەدى ول وسى تۋرالى. مۇنداي سەمينارلار 19 ناۋرىزعا دەيىن ەلىمىزدىڭ بارلىق ايماقتارىندا وتكىزىلەدى. بۇل جيىندارعا ورتالىق سايلاۋ كوميسسياسىنىڭ مۇشەلەرى مەن وسك ورتالىق اپپاراتىنىڭ قىزمەتكەرلەرى قاتىسۋدا. ءبۇگىندە اۋماقتىق سايلاۋ كوميسسيالارىنىڭ ماجىلىستەرى داۋىس بەرۋ كۇنىنە ازىرلىك شارالارىنا بايلانىستى ءوتىپ جاتىر. ال 18 ناۋرىزدا ءبىز استانا قالالىق سايلاۋ كوميسسياسىنىڭ سايلاۋ كۇنىنە دايىندىعىن تىڭدايمىز. بۇل شارالارعا جەرگىلىكتى اتقارۋشى ورگاندار مەن ىشكى ىستەر ورگاندارىنىڭ قىزمەتكەرلەرى دە قاتىسۋدا.
قۋاندىق تۇرعانقۇلوۆ, سونداي-اق پرەزيدەنتتىككە كانديداتتاردىڭ باق-تاردا ۇگىت ماتەريالدارىن جاريالاۋدا زاڭناما تالاپتارى ساقتالىپ وتىرعانىن اتاپ ءوتتى. ونىڭ ايتۋىنشا, ورتالىق سايلاۋ كوميسسياسى پرەزيدەنتتىككە كانديداتتاردىڭ ماتەريالدارىنىڭ بۇقارالىق اقپارات قۇرالدارىندا جاريالانۋىنا مونيتورينگ ءجۇرگىزىپ وتىر. كانديداتتاردىڭ ەلەكتروندى اقپارات قۇرالدارى مەن ءباسپاسوز بەتتەرىندەگى ماتەريالدارى مەرزىمى مەن كولەمى بويىنشا بىردەي جاريالانىپ كەلەدى.
ورتالىق سايلاۋ كوميسسياسى اۋماقتىق جانە ۋچاسكەلىك سايلاۋ كوميسسيالارى ءۇشىن اقپاراتتىق-ادىستەمەلىك جانە باعىت-باعدار بەرەتىن ماتەريالداردى دايىنداۋ ءىسىن تولىق اياقتادى. پرەزيدەنتتىككە كانديداتتان باستاپ, سەنىم بىلدىرىلگەن ادامدارعا دەيىن بىلۋلەرى ءتيىس 30-عا جۋىق كىتاپشا مەن 8-دەن استام پلاكات دايىندادى. بۇعان قوسا تاعى 23 روليك شىعارعان. سونىمەن قاتار, بىرقاتار باق ورتالىق سايلاۋ كوميسسياسىنا ارنايى بەت ارناپ وتىر. وندا ءتۇسىندىرۋ, اقپاراتتاندىرۋعا قاتىستى ءمالىمەتتەر مەن سايلاۋ بارىسىنا بايلانىستى وزگە دە اقپاراتتار جاريالانۋدا.
وسك توراعاسى پرەزيدەنتتىكتەن ءۇمىتكەرلەر مەلس ەلەۋسىزوۆ پەن عاني قاسىموۆتىڭ ۇگىت بيلبوردتارىن ورنالاستىرۋ جايىندا ورتالىق سايلاۋ كوميسسياسىنان كومەك سۇراعانىنان دا حاباردار ەتتى. پرەزيدەنتتىككە كانديداتتار م.ەلەۋسىزوۆ پەن ع.قاسىموۆ ورتالىق سايلاۋ كوميسسياسىنان الماتى مەن استانا قالالارىندا جانە ەلىمىزدىڭ بىرقاتار وبلىس ورتالىقتارىندا وزدەرىنىڭ سايلاۋالدى ۇگىت جۇمىستارىن جۇرگىزۋ ءۇشىن سىرتقى جارناما مەن بيلبوردتار ورنالاستىرۋعا كومەك كورسەتۋدى سۇرادى, دەدى وسك باسشىسى. الايدا, وسى شارانى جۇزەگە اسىرۋشى مەكەمەلەر بۇل جۇمىستى ءبىرشاما ۇزاققا سوزىپ جىبەردى. استانا مەن الماتىدا جانە بىرقاتار وبلىس ورتالىقتارىندا بۇل كانديداتتاردىڭ جاڭا بيلبوردتارى مەن جارنامالارى ورنالاستىرىلاتىن بولادى.
ق.تۇرعانقۇلوۆ بريفينگ بارىسىندا وسك-عا تۇسكەن ارىز-شاعىمدارعا دا توقتالدى. ونىڭ كەلتىرگەن مالىمەتتەرى بويىنشا, وسىدان ءۇش كۇن (16 ناۋرىز) بۇرىن «لايىقتى تۇرعىن ءۇي» قوعامدىق ۇيىمىنان 136 ءوتىنىش تۇسكەن. بۇل وتىنىشتەر – ورتالىق سايلاۋ كوميسسياسىنىڭ قۇزىرىنا جاتپايتىن ماسەلەلەر. وتىنىشتەر بانك پەن قۇرىلىس مەكەمەلەرىنىڭ جانە جەكە تۇلعالار اراسىنداعى داۋعا بايلانىستى. ءوتىنىش بەرۋشى 136 ادام وزدەرىنىڭ ماسەلەلەرى شەشىلمەسە, داۋىس بەرۋگە كەلمەيتىندىكتەرىن ايتقان. ال وسك باسشىلارى بۇل ازاماتتارعا وزدەرىنىڭ قۇقىقتارىن وزدەرى شەكتەپ وتىرعاندىقتارىن جەتكىزگەن.
ءاليسۇلتان قۇلانباي.