كەشە الماتىدا قالالىق سايلاۋ كوميسسياسىنىڭ بۇگىنگى تاڭداعى باستى ءىس-شاراعا ارنالعان كەزەكتى وتىرىسى بولىپ ءوتتى. جيىندا الماتى قالالىق سايلاۋ كوميسسياسىنىڭ توراعاسى ءادىل ءجۇنىسوۆ جينالعاندارعا كۇن ءتارتىبىندەگى ماسەلە جونىندە جان-جاقتى بايانداپ بەردى. ءادىل ماۋلەن ۇلىنىڭ ايتۋىنشا, بيىلعى جىلعى 13 ناۋرىزداعى مالىمەت بويىنشا الماتى قالاسىنداعى سايلاۋشىلار سانى 955525 ادامدى قۇرايدى. سونىمەن قاتار, وڭتۇستىك استانادا ءبىر قالالىق, جەتى اۋداندىق جانە 467 ۋچاسكەلىك سايلاۋ كوميسسيالارى جۇمىس ىستەۋدە. ەڭ باستىسى, ۋچاسكەلىك سايلاۋ كوميسسيالارىنىڭ وزدەرىنە جۇكتەلگەن قىزمەتتى ساپالى جانە جاۋاپكەرشىلىكپەن, انىعىراق ايتقاندا, جوعارى تالاپ دەڭگەيىندە اتقارۋى ءۇشىن قولايلى جاعداي جاساۋ ءىس-شارالارى كەڭىنەن قاراستىرىلۋدا.
– ۇيىمداستىرۋ ءىس-شارالارىندا, اسىرەسە سايلاۋشىلارعا, پرەزيدەنتتىككە كانديداتتاردىڭ سەنىمدى وكىلدەرى مەن بايقاۋشىلارعا ارنالعان قاجەتتى اقپاراتتاردىڭ تولىق دەڭگەيدە قامتىلۋى باستى شارت. سوعان وراي, بۇل باعىتتا بىرقاتار جۇمىستار ءجۇرگىزىلىپ, دايىندىق جۇمىستارى تالاپقا ساي. ءسوز رەتى كەلگەندە اتاپ ايتارلىعى, سايلاۋشىلارعا ارنالعان مالىمەتتەر قالالىق باسىلىمدار «الماتى اقشامى» مەن «ۆەچەرنيايا الماتىدا» جاريالاندى. ال, مۇنىڭ ءوزى تۇسىنىسپەستىكتى جويۋدا كومەكتەسەتىنى ءسوزسىز. باقىلاۋشىلار جاعدايىنا كەلسەك, ءبىزدىڭ الدىن-الا ەسەپتەۋىمىز بويىنشا قالاداعى ءاربىر سايلاۋ ۋچاسكەسى بويىنشا ءبىرشاما باقىلاۋشىلار قاتىسا الادى. بيىلعى سايلاۋدىڭ تازا ءارى ادىلەتتى ءوتۋى دە باقىلاۋشىلار بەلسەندىلىگىنە تىكەلەي بايلانىستى, – دەيدى ءادىل ءجۇنىسوۆ.
بۇل ورايدا, ايتا كەتەتىن تاعى ءبىر ءجايت, قالالىق سايلاۋ كوميسسياسى جۇمىسىنا قولبايلاۋ بولعان جاعدايلار دا كەزدەسكەن. ءماسەلەن, رەسپۋبليكاداعى ەڭ ءىرى شاھار, ميلليوننان استام تۇرعىنى بار قالاداعى جاڭا اۋدانداردىڭ تۇرعىندارىن دەر كەزىندە تاۋىپ, تىركەۋ جۇمىسى بىرقاتار كۇردەلىلىك تۋدىرعان. دەگەنمەن, قالالىق ءادىلەت باسقارماسى, حالىققا قىزمەت كورسەتۋ ورتالىعى ماماندارىنىڭ كومەگىمەن بۇل تۇيتكىل شەشىلگەن. سايلاۋ كوميسسياسىنىڭ ءوز جۇمىسىن تياناقتى جانە ىسكەرلىكپەن جۇرگىزۋى ءناتيجەسىندە, بارلىق ۋچاسكەلەر مەملەكەتتىك رامىزدەرمەن جانە وزگە دە قاجەتتى قۇجاتتارمەن قامتاماسىزداندىرىلادى. سونداي-اق, ءاربىر سايلاۋشىعا شاقىرۋ بيلەتتەرىن جىبەرۋ قولعا الىنعان.
باقىت بالعارينا.
الماتى.