ەل پرەزيدەنتتىگىنەن ۇمىتكەر جامبىل احمەتبەكوۆ ءوزىنىڭ تۋعان جەرى – اقمولا وبلىسى قورعالجىن اۋدانىنا ارنايى اتباسىن بۇرىپ, جەرگىلىكتى سايلاۋشىلارمەن كەزدەسۋ وتكىزدى. ۇگىت-ناسيحات توبىنىڭ قۇرامىندا قازاقستان كوممۋنيستىك حالىقتىق پارتياسى ورتالىق كوميتەتىنىڭ مۇشەلەرى, پرەزيدەنتتىكتەن ۇمىتكەردىڭ سەنىم بىلدىرىلگەن ادامدارى جانە جۋرناليستەر قاۋىمى بولدى. قورعالجىن اۋدانىنا كەلگەن ولار اۋدان كوشەسىن قىزىل تۋمەن ءجۇرىپ ءوتىپ, جەرگىلىكتى حالىقتى پرەزيدەنتتىككە كانديداتتىڭ ۇگىت-ناسيحات توبىنىڭ كەلگەندىگىنەن حاباردار ەتتى.
اۋدان ىشىندە ۇيىمداستىرىلعان ءىس-شارا جامبىل احمەتبەكوۆتىڭ تۋعان جەرى جانە وسكەن ورتاسى – شالقار اۋىلىندا جالعاسىن تاپتى. اۋىل تۇرعىندارى ءوز جەرلەستەرىن جىلى جۇزبەن قارسى الدى. مەكتەپ جاسىنداعى بالالاردىڭ بار نازارى اۋىلدىڭ قۇرمەتتى قوناعىندا بولدى. ولاردى ءبىرىنشى كەزەكتە ج.احمەتبەكوۆتىڭ بولاشاقتاعى جوسپارلارى مەن ماقسات-مۇراتتارى قىزىقتىردى. ماسەلەن, وقۋشىلار «ەگەر پرەزيدەنت بولساڭىز, قانداي ماسەلەلەردى شەشەر ەدىڭىز؟», «مەملەكەت باسشىسى بولۋى ءۇشىن ەڭ الدىمەن نە كەرەك؟» دەگەن تۇرعىدا وزدەرىن قىزىقتىرعان ساۋالداردى قويدى. ياعني, بۇل كۇنى اعا بۋىن وكىلى مەن كەيىنگى تولقىن اراسىندا اسەرلى اڭگىمە ءوربىدى. ال ج. احمەتبەكوۆ ءوز كەزەگىندە جاسوسپىرىمدەرمەن پىكىرلەسۋ بارىسىندا ەلدىڭ بولاشاعى ارقايسىمىزدىڭ قولىمىزدا ەكەنىن, سوندىقتان, ەڭ باستىسى – مەملەكەتتىڭ بۇگىنگى جاعدايىنا, وتانىمىزدىڭ بولاشاعىنا نەمقۇرايلى قاراماۋ قاجەتتىگىن باسا ايتىپ ءوتتى.
ۇگىت-ناسيحات ساپارى بارىسىندا پرەزيدەنتتىكتەن ۇمىتكەر ءوزى تۋىپ-وسكەن, بالالىق شاعى وتكەن ۇيگە دە اتباسىن تىرەدى. جامبىل احمەتبەكوۆ – كوپ بالالى وتباسىندا ەرجەتكەن. اكەسى اۋجان جامبىل 7 جاستا بولعاندا دۇنيەدەن وتەدى. ءسويتىپ, ول جاستايىنان تىرشىلىكتىڭ اششى ءدامىن تاتىپ وسەدى. اناسى كۇلشايراعا وتباسىن ءبىر ءوزى عانا اسىراۋ وڭايعا تۇسپەيدى. سوندىقتان, جامبىل وتباسىنىڭ ۇلكەن بالاسى رەتىندە ەڭبەككە ەرتە ارالاسادى... بۇگىندە كۇلشايرا اپا 83 جاسقا تولىپ وتىر. باتىر انا. اق جاۋلىقتى اجەنىڭ قاسىندا قازىرگى تاڭدا ونىڭ قىزى, جامبىل احمەتبەكوۆتىڭ ۇلكەن اپكەسى ساۋلە بار ەكەن.
پرەزيدەنتتىكتەن ۇمىتكەردىڭ ۇگىت-ناسيحات توبىنىڭ قۇرامىندا سونداي-اق, الماتىدان ارنايى كەلگەن ارتىستەر – «قارا جورعا» ونەر ۇجىمى بولدى. ولاردىڭ قاتىسۋىمەن قورعالجىن اۋىلىنىڭ ءمادەنيەت ۇيىندە كونتسەرت ۇيىمداستىرىلدى. كونتسەرت باعدارلاماسى كەزىندە جامبىل احمەتبەكوۆتىڭ ءوزى ءسوز الىپ, سايلاۋالدى تۇعىرناماسىنىڭ باسىم باعىتتارىنا توقتالىپ ءوتتى.
اتالعان ءىس-شارا اياسىندا قازاقستان كوممۋنيستىك حالىقتىق پارتياسىنىڭ حاتشىسى ۆلاديسلاۆ كوسارەۆ پارتيا شەشۋگە, تۇيتكىلىن تارقاتۋعا مۇددەلىلىك تانىتىپ وتىرعان ماسەلەلەردى اڭگىمە وزەگىنە اينالدىردى. كەزدەسۋ سوڭىندا اۋىل تۇرعىندارى جامبىل احمەتبەكوۆكە ەلدىڭ قاراپايىم جۇمىسشىلارىنا مورالدىق قولداۋ كورسەتكەنى ءۇشىن العىستارىن جەتكىزدى.
ءلايلا ەدىلقىزى. اقمولا وبلىسى.