كەشە «تابيعات» ەكولوگيالىق وداعىنىڭ توراعاسى, قازاقستان پرەزيدەنتتىگىنە كانديدات مەلس ەلەۋسىزوۆ ەقىۇ-نىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ ەلىمىزدەگى پرەزيدەنتتىك سايلاۋدى بايقاۋشىلار ميسسياسىنىڭ باسشىسى داان ەۆەرتسپەن كەزدەستى.
كەزدەسۋ استاناداعى ەقىۇ-نىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسى ميسسياسىنىڭ عيماراتىندا ءوتتى. پرەزيدەنتتىككە كانديدات پەن ميسسيا باسشىسىنىڭ كەزدەسۋى ءوزارا تۇسىنىستىك جاعدايىندا ءوتىپ, ونىڭ بارىسىندا ناۋقانعا قاتىستى ماسەلەلەر ءسوز بولدى.
وسى رەتتە ميسسيا تۋرالى بىرەر ءسوز ايتا كەتكەن ءلازىم. ول ەلىمىزدە ۇستىمىزدەگى جىلدىڭ 3 ساۋىرىندە كەزەكتەن تىس وتەتىن پرەزيدەنتتىك سايلاۋ بارىسىن بايقاۋ ءۇشىن قۇرىلعان. ونىڭ قۇرامىندا 15 ساراپشى بولسا, ولار الماتى جانە استانا قالالارىندا شوعىرلاناتىن بولادى, سونىمەن قاتار, جەر-جەردە سايلاۋعا دەيىن ءبىر اي قالعاندا 28 ۇزاق مەرزىمدى بايقاۋشىلار دا جۇمىس ىستەيدى. اتالعان ميسسيا ەقىۇ-عا قاتىسۋشى مەملەكەتتەردىڭ اتىنان 400 قىسقا مەرزىمدىك بايقاۋشى جىبەرۋدى كوزدەيدى.
ميسسيا سايلاۋدىڭ ەقىۇ پرينتسيپتەرىنە جانە حالىقارالىق دەموكراتيا ۇلگىسىنە سايكەستىگىن, سونىمەن قاتار, مەملەكەت زاڭناماسىنا سايكەستىگىن باعالايتىن بولادى. بايقاۋشىلار سونداي-اق ساياسي ۇگىت جۇمىستارىنىڭ بارىسىن, سايلاۋ زاڭناماسىنىڭ ساقتالۋىن, بۇقارالىق اقپارات قۇرالدارىندا جاريالانۋى جاعدايىن, سايلاۋ كوميسسيالارى مەن باسقا دا ماڭىزدى مەملەكەتتىك قۇرىلىمدار جۇمىسىن جان-جاقتى باقىلايدى.
اسقار تۇراپباي ۇلى.