نۇرساي – رەسپۋبليكامىزدىڭ ەڭ شالعايدا ورنالاسقان اۋىلدارىنىڭ ءبىرى. بۇدان ءۇش-ءتورت جىل بۇرىن جۋرناليستىك ىسساپارمەن وسى اۋىلعا جولىمىز تۇسكەن ەدى. سول كەزدە نۇرسايلىقتاردىڭ اۋىز سۋدان ۇلكەن قيىندىق كورىپ جۇرگەندەرىنە, ولار ونى جىراقتاعى لەكەر كولى ماڭىنان تاسىپ ءىشىپ وتىرعانىنا كۋا بولعانبىز. ەكىنشىدەن, سوناۋ جەتپىسىنشى جىلدارى سالىنعان ورتا مەكتەپ عيماراتىنا سول ۋاقىتتان بەرى كۇردەلى جوندەۋ جۇرگىزىلمەگەن ەكەن. كۇزدىڭ ىزعىرىق كۇندەرى مەن ۇيىتقي سوققان قىسقى بورانداردا عيمارات ءىشىن كەۋلەگەن جەل مۇنداعى وقۋشىلاردى دىردەكتەتىپ قويا بەرەتىنى جونىندەگى اڭگىمەلەردى دە قۇلاعىمىز شالعان-دى.
ارينە, سودان سوڭ گازەتىمىزگە نۇرساي اۋىلىنىڭ قوس تۇيتكىلى جونىندە سىن ماقالا جازىلعان بولاتىن. ايتسە دە سول كەزدە بۇعان وڭىردەگى اتقارۋشى بيلىك جەتەكشىلەرىنىڭ ءبىر دە ءبىرى سەلت ەتپەگەنىنە قايران قالعانبىز. دەگەنمەن, يگىلىكتىڭ ەرتە كەشى جوق دەگەندەي, تاياۋدا وسى اۋىلدا اۋىز سۋمەن قامتۋ جۇيەسى پايدالانۋعا بەرىلىپ, مەكتەپ عيماراتىنا كۇردەلى ءجوندەۋ جۇرگىزىلگەنى ۇلكەن قۋانىش سەزىمىن تۋعىزادى. جىلىكتەپ ايتار بولساق, «اقبۇلاق» مەملەكەتتىك باعدارلاماسى بويىنشا جۇزەگە اسقان جوباعا 247 ميلليون تەڭگە قاراجات بولىنگەن. ال مەكتەپتىڭ كۇردەلى جوندەۋىنە 162 ميلليون تەڭگە جۇمسالعان.
اۋىز سۋ جۇيەسىن تارتۋعا ەسەپتەلگەن مەردىگەرلىك جۇمىستار و باستا 11 ايعا ەسەپتەلسە, ونى وڭىردەگى قۇرىلىس سالاسى تارلاندارىنىڭ ءبىرى كاريموللا جاقىپوۆ باسقاراتىن «قۇرىلىسگاز» جشس-ءنىڭ قۇرىلىسشىلارى نەبارى ءۇش ايدان استام ۋاقىت ىشىندە ساپالى تۇردە اياقتاپ شىققانى تاعى ءبىر مەرەي. بۇل رەتتە اتالمىش نىساننىڭ جەدەل ىسكە قوسىلۋىنا باتىس قازاقستان وبلىسىنىڭ اكىمى التاي كولگىنوۆتىڭ تىكەلەي شاپاعاتى تيگەنىن ايتپاي كەتسەك شىندىققا قيانات.
گاپ مىنادا. نۇرساي اۋىلىنداعى سۋمەن قامتۋ جۇيەسىن اياقتاۋعا اۋداندىق بيۋدجەتتەن بولىنگەن قاراجات تاپشىلىق جاساعان ەكەن. وسى جايتقا كازتالوۆ اۋدانىنا ساپارى بارىسىندا كۋا بولعان ءوڭىر باسشىسى شۇعىل شەشىم قابىلداپ, وبلىستىق بيۋدجەتتەن تاعى دا قوسىمشا 182 ميليون تەڭگە بولدىرۋگە ىقپال جاساپتى. كۇنى بۇگىن اۋىلداعى 136 ءۇيدىڭ 126-سى اۋىز سۋ جۇيەسىنە قوسىلىپ ۇلگەرگەن. قازىر بۇل ءىستى تولىقتاي اياقتاۋ جۇمىستارى دا مارەگە تايالىپ كەلەدى.
مىنە, كەشەگى ءبىر كۇندەرى شالعايداعى نۇرساي اۋىلى تۇرعىندارىنىڭ توبەلەرىن كوككە جەتكىزگەن قوس قۋانىشتىڭ سىرى وسىنداي.
تەمىر قۇسايىن,
«ەگەمەن قازاقستان»
باتىس قازاقستان وبلىسى
كازتالوۆ اۋدانى
نۇرساي اۋىلى