قىزىلاعاش اۋىلىنداعى سۋ اپاتىنىڭ بولعانىنا دا ءبىر جىل وتە شىقتى. سوعان وراي وبلىس اكىمدىگىنىڭ قولداۋىمەن وسى ۋاقىتتىڭ ىشىندە تولىقتاي دەرلىك جاڭادان سالىنعان اۋىلدا اپاتتا قازا بولعاندارعا ارنالىپ اس بەرىلدى.
قاسيەتتى جۇما كۇنى قىزىلاعاش اۋىلىنا وبلىس اكىمى سەرىك ءۇمبەتوۆ باستاعان ەل اعالارى مەن ارداگەرلەر, زيالى قاۋىم وكىلدەرى ارنايى اتباسىن تىرەدى. القالى توپ الدىمەن قازا تاپقاندارعا قويىلعان ەسكەرتكىشتىڭ الدىنا جينالىپ, ارۋاقتارعا تاعزىم ەتىپ, اقسارباس شالدى. قازاقستان مۇسىلماندارى ءدىني باسقارماسىنىڭ تالدىقورعان وڭىرىندەگى وكىل يمامى ءجۇمانالى امانوۆ بوزداقتاردىڭ ارۋاعىنا قۇران باعىشتاپ, دۇعا جاسادى.
كەلەسى كەزەكتە 2010 جىلدىڭ 10 قازانىندا قۇرىلعان “جانسۇگىروۆ” قوعامدىق قورىنىڭ قايىرىمدىلىق جولىمەن جينالعان قارجىسىنا ساتىپ الىنعان اۋىلشارۋاشىلىق تەحنيكالارىن “قىزىلاعاش Ltd” جشس-نە تاپسىرۋ سالتاناتى وتكىزىلدى.
“جانسۇگىروۆ” قوعامدىق قورىنىڭ باستاماسىمەن قۇرىلعان “قىزىلاعاش Ltd” جاۋاپكەرشىلىگى شەكتەۋلى سەرىكتەستىگىنىڭ كاپيتالى 180 ميلليون تەڭگەنى قۇرايدى. اتالعان سەرىكتەستىككە بۇل جولى قۇنى 135 ملن. تەڭگەنى قۇرايتىن 45 تەحنيكا تابىس ەتىلدى. سونداي-اق, “جانسۇگىروۆ” قوعامدىق قورى تاراپىنان ۇجىمنىڭ ماتەريالدىق بازاسىن نىعايتۋعا 35 ميلليون تەڭگە ءبولىنىپ وتىر. بۇل قولداۋ اۋىل تۇرعىندارىن شىن قۋانتىپ, كوڭىلدەرىن كوككە كوتەرىپ تاستاعانداي بولدى.
ماشينا-تراكتور ستانساسى ماڭىنا جينالعان كوپشىلىكتىڭ الدىندا وبلىس اكىمى سەرىك ءۇمبەتوۆ ءسوز الدى.
– حالقىمىزدا اپات بولعان جەرگە, قايتىس بولعان باۋىرلارىمىزعا اس بەرەتىن يگى ءداستۇر بار. بۇگىن وسىنداي سەبەپپەن جينالدىق. سوعان وراي, قىزىلاعاش تۇرعىندارىنىڭ الەۋمەتتىك جاعدايىن جاقسارتۋ جانە كوكتەم مەن كۇزگى جۇمىستارىنا سەپتىگى بولار دەگەن ويمەن “قىزىلاعاش Ltd” جشس-ىن قۇرىپ, بۇگىن ونىڭ قۇزىرىنا 45 جاڭا تەحنيكا تاپسىرىپ وتىرمىز. مۇنداي تەحنيكالىق قۋات قازىرگە دەيىن ەلىمىزدىڭ ەشبىر اۋىلىندا جوق. قازىر قولدارىڭىزدا 150 توننا تۇقىم بار ەكەن. وعان تاعى دا 150 توننا تۇقىم قوسىپ, تۇرعىنداردىڭ 1500 گەكتار جەردى يگەرۋىنە جاعداي جاساماقپىز. مۇنىڭ سىرتىندا تاعى ءبىر “كاماز” جۇك كولىگى مەن ءبىر بەنزوۆوز ساتىپ الىپ بەرۋگە ءوزىمىز كومەكتەسەمىز. حالىقتىڭ كوڭىل-كۇيى كوتەرىڭكى, ءبارى دە مەملەكەت قامقورلىعىنا العىستارىن ايتىپ, راحمەتىن جاۋدىرىپ وتىر. بۇگىن اسپاننان نۇر جاۋىپ تۇر. الداعى ناۋرىز مەيرامىن دا سىزدەرمەن بىرگە قارسى الاتىن بولامىن, – دەدى ول.
وسىدان كەيىن كوپشىلىك الدىنا شىققان اۋداندىق ارداگەرلەر كەڭەسىنىڭ توراعاسى نۇربەك قاسىمبەكوۆ اقساقال:
– ولكەمىزدى باسشىلار ايالايدى,
قامقورشى بوپ حالقىنا سايالايدى.
قۇرىلىس ساپ, جول جوندەپ, سۋ جۇرگىزىپ,
ءوز حالقىنان ەشتەڭە ايامايدى, – دەپ ولەڭمەن اق تىلەگىن ايتسا, كەلەسى ءسوز كەزەگىن العان “كازاگروتەحسناب” جشس-نىڭ وكىلى باعلان مۇقتارعالي ۇلى جاڭا تەحنيكالاردىڭ مۇمكىندىگىن تانىستىرا كەلىپ, سەرىكتەستىك اتىنان “قىزىلاعاش Ltd” جشس ۇجىمىنا “نيۆا” اۆتوكولىگىنىڭ كىلتىن تابىس ەتتى.
وسىنداي يگىلىكتى ىستەرگە كۋا بولعان كوپشىلىك بۇدان كەيىن ءى. جانسۇگىروۆ اتىنداعى ورتا مەكتەپتىڭ سپورت زالىنا جايىلعان داستارقانعا بەت الدى. بۇل جەردە دە قازا بولعاندار رۋحىنا قۇران باعىشتالىپ, اۋىلدىڭ جارقىن بولاشاعىن قالىپتاستىرۋ جايىنداعى اق تىلەكتەر ايتىلىپ جاتتى. “ورنىندا بار وڭالار” دەگەنىمىز وسى دا.
كۇمىسجان بايجان.