جاپونيانىڭ ەڭ ءىرى حونسيۋ ارالىندا الاپات جەر سىلكىنىسى تىركەلدى. ونىڭ كۇشى, كەيبىر دەرەكتەرگە قاراعاندا, 8,9 باللعا جەتكەن. ءزىلزالانىڭ ەپيتسەنترى تىنىق مۇحيتىنىڭ تۇبىندە ورنالاسىپتى. وسىنىڭ سالدارىنان بيىكتىگى 10 مەترگە دەيىن تسۋنامي كوتەرىلگەن.
ەل استاناسى توكيونىڭ وزىندە 4 مىڭداي عيمارات قيراعان. ءزىلزالادان وپات بولعاندار سانى ازىرشە بەلگىسىز. الىپ تولقىندار جاعالاۋعا جاقىن ماڭداعى ەلدى مەكەندەردى شايىپ كەتكەن. ەندى تسۋنامي وڭتۇستىك-شىعىس ازيانىڭ بىرقاتار ەلدەرىنە جانە اۆسترالياعا قاۋىپ ءتوندىرۋى ىقتيمال. كوپتەگەن تۇرعىندار قاۋىپسىز جەرلەرگە كوشىرىلۋدە.
رەسەي اۋعانستانعا تىكۇشاقتار ساتادى
رەسەي مەن ناتو اۋعانستانعا 24 كوپماقساتتى مي-17 تىكۇشاقتارىن ساتۋ تۋرالى ۋاعدالاستىققا قول جەتكىزدى. كەلىسىم-شارتقا وسى جىلدىڭ ناۋرىز ايىنىڭ اياعىنا دەيىن قول قويىلادى دەپ كۇتىلۋدە. كەلىسسوز ۇدەرىسىندە ناتو تارابىنان اقش وكىلەتتىلىك ەتتى.
ءسويتىپ, رەسەي جاعى اۋعانستانعا 24 تىكۇشاق ساتاتىن بولسا, تاعى ۇشەۋىن تەگىن بەرمەك. قارجى ناتو-نىڭ ارنايى قورىنان تولەنەدى. بۇل قور تاياۋ بولاشاقتا قۇرىلاتىن بولىپ بەلگىلەنگەن. وعان اليانسقا مۇشە مەملەكەتتەردىڭ بارلىعى جەكە-جەكە جارنا ەنگىزۋلەرى ءتيىس. وسىلايشا اۋعانستاننىڭ اسكەري-اۋە كۇشتەرىندەگى رەسەي اۋە كەمەلەرىنىڭ سانى 100-گە جەتپەك.
ساۋديادا ميتينگىلەتۋگە رۇقسات جوق
ساۋد ارابياسىنىڭ ءال-كاتيف قالاسىندا بەيسەنبى كۇنى كەشكىسىن دەمونستراتسياعا شىققان 3 ادام جاراقات الدى. ميتينگكە شىعۋشىلار شيتتەردىڭ وكىلدەرى بولىپ تابىلادى. جالپى, اتالعان قالانىڭ كوشەلەرىنە, ارالارىندا ايەلدەر دە بار, شامامەن 800 شيت شىققان ەكەن.
ولاردىڭ تالاپتارى – بىرەۋ: قاماۋعا الىنعان شيت وكىلدەرىن بوساتۋ. ميتينگكە شىققانداردى قۋىپ تاراتۋعا 200-دەي پوليتسيا قىزمەتكەرى قاتىسقان. ولاردىڭ ايتقاندارىنا باعىنباعاندارعا قارسى وق اتىلعان. ۇستىمىزدەگى جىلعى ناۋرىز ايىنىڭ باسىنان ساۋديا ىشكى ىستەر مينيسترلىگى ەلدە دەمونستراتسياعا شىعۋعا تىيىم سالعان بولاتىن. ۆەدومستۆوداعىلاردىڭ ايتۋلارىنشا, ميتينگتەر شاريعاتقا قايشى كەلەدى. بۇل تىيىمنىڭ باسقا, ياعني باستى استارى بار ەكەنى دە تۇسىنىكتى.
رەسەيگە دەگەن كوزقاراس
ۇلىبريتانيانىڭ راديوحابارلارىن تاراتاتىن ۆۆس كورپوراتسياسىنا قاراستى GlobeScan كومپانياسىنىڭ ساراپشىلارى وزدەرى جۇرگىزگەن سۇراۋ سالۋلاردىڭ كەزەكتى ناتيجەلەرىن جاريا ەتتى. الەمنىڭ 27 مەملەكەتىندە جۇرگىزىلگەن سۇراۋ سالۋلار بويىنشا رەسپوندەنتتەر رەسەيدىڭ الەمگە ىقپالى جونىندەگى كوزقاراسىن بۇرىنعىسىنشا تەرىستەۋ كۇيىندە قالدىرعان.
رەسەيگە وڭ كوزقاراس تانىتقان ەلدەر قاتارىندا ءۇندىستان, قىتاي, وڭتۇستىك كورەيا بار. ال اسا وڭ باعامعا يە بولعان ەل گەرمانيا بولىپ وتىر. ەڭ تەرىس باعا العان مەملەكەت يران بولىپ تابىلادى. بۇل ەل بىلتىر دا كوش باسىندا تۇرعان ەكەن. سونداي-اق الەمگە تەرىس ىقپالدى مەملەكەتتەر قاتارىندا پاكستان, كورەيا حالىق-دەموكراتيالىق رەسپۋبليكاسى جانە يزرايل اتالعان. اقش-قا قاتىستى كوزقاراس ەكىۇداي.