قىرعىزستان توتەنشە جاعدايلار مينيسترلىگى جانىنداعى ءورت قاۋىپسىزدىگى جونىندەگى اگەنتتىكتىڭ ديرەكتورى ميرلان مولدوكماتوۆ وسى لاۋازىمدى قىزمەتىنە تاعايىندالعانعا دەيىن ءۇش مارتە قىلمىستىق جاۋاپكەرشىلىككە تارتىلىپتى. وعان قىزمەت بابىن اسىرا پايدالانۋ, جەمقورلىق قىلمىس سياقتى تەرىس ارەكەتتەرى سەبەپ بولىپتى. بۇل جونىندە قىرعىزستاننىڭ باس پروكۋراتۋراسى حابارلاعان.
وسىعان بايلانىستى باس پروكۋراتۋرا ەل پرەمەر-ءمينيسترى المازبەك اتامباەۆقا زاڭ بۇزۋشىعا قارسى شارا قولدانۋ تۋرالى ۇسىنىس ەنگىزگەن. ال م.مولدوكماتوۆ نە ءبۇلدىرىپ قويدى دەگەنگە كەلسەك, ول 2008 جىلى كاسىپكەرلەرگە ءورت ءسوندىرۋ ءبولىمى اۋماعىن زاڭسىز جالعا بەرىپتى. كەلەسى جىلى قىزمەت ورنىن ەش سەبەپسىز تاستاپ كەتۋىنە بايلانىستى ۇستىنەن قىلمىستىق ءىس قوزعالعان. سونداي-اق مەملەكەتتىك ساتىپ الۋلاردى جوعارى باعا قويۋ ارقىلى جۇزەگە اسىرعان.
تۇرىك مودەلىنە نەمىس ۆيزاسى بەرىلمەدى
تۇرىك مودەلى سەزگي مەلەك تيۋزەل گەرمانيادا وتەتىن مودەلدەر بايقاۋىنا قاتىسپاق نيەتتە ەدى. بىراق وعان گەرمانيا ۆيزاسى بەرىلمەي تاستالدى. ال باسقا ەلدەردەن كونكۋرسقا قاتىسۋشىلاردىڭ بارلىعى ءوز ۋاقىتىندا قولدارىنا ۆيزا الىپ ۇلگەرگەن. ءتىپتى افريكانىڭ كەيبىر ەلدەرىنىڭ سۇلۋلارىنا دا ۆيزا ەش قيىندىقسىز بەرىلسە كەرەك.
گەرمانيادا وتەتىن مودەلدەر كونكۋرسىنىڭ فينالى 16 ناۋرىزعا بەلگىلەنگەن ەكەن. وعان قاتىساتىندار تىزىمىندە تۇرىك مودەلىنىڭ اتى-ءجونى ءالى كۇنگە جوق كورىنەدى. جالپى, سوڭعى ۋاقىتتاردا تۇركيا تۇرعىندارى نەمىستىڭ ديپلوماتيالىق ۆەدومستۆوسى تاراپىنا كوپتەگەن شاعىمدار ءتۇسىرىپ جاتىر. ويتكەنى, ولارعا ۆيزا كەيدە كەشىكتىرىلىپ بەرىلسە, كەيدە مۇلدەم بەرىلمەيدى ەكەن.