اقتاۋدا م.وسكەنباەۆ اتىنداعى وبلىستىق فيلارمونيانىڭ ۇيىمداستىرۋىمەن حالقىمىزدىڭ ءبىرتۋار ۇلدارىنىڭ ءبىرى, حالىق ءارتىسى, مەملەكەتتىك سىيلىقتىڭ لاۋرەاتى, داۋلەسكەر كۇيشى قارشىعا احمەدياروۆقا ارنالعان «كۇي ۇران» اتتى ەسكە الۋ كەشى بولدى. وسى ءبىر ساعىنىشقا تولى سازدى كەشتە قارشىعانىڭ ونەردەگى دوسى, اعاسى سەرجان شاكىرات ەسبايدىڭ «ءوتتىڭ دۇنيە» كۇيىن تەبىرەنە, تولعانا ورىنداپ, ايگىلى ونەرپاز جايلى ەستەلىكتەر ايتتى. ودان ءارى ابىل اتىنداعى ۇلت اسپاپتار وركەسترى قارشىعانىڭ «التىن ۇيا» اتتى كۇيىن ادەمى ورىندادى. تۇبەكتىڭ بەلگىلى ونەرپازدارى ر.ايدارباەۆا, گ.قولعاناتوۆ, ن.مۇساعاليەۆ, س.بورانوۆا, ب.تولەمبەتوۆ اۆتوردىڭ سىرعا تولى, سازدى اۋەندەرىن شالقىتتى. وسى كەشتە ايگىلى ونەرپازدىڭ ەكىنشى سازگەرلىك قىرىن جارقىراتا كورسەتكەن «جەر-انا», «شابىت», «اۋىلىم», «كوكتەم سازى», ت.ب. اندەرىن ولكەنىڭ ونەر جۇلدىزدارى ناقىشىنا كەلتىرە جەتكىزدى.
ەسكە الۋ كەشىنىڭ سوڭى قارشىعانىڭ «كۇي ۇران» كۇيىمەن اياقتالدى. جينالعان جۇرتشىلىق قارشىعانى ساعىنىپ-اق قالىپتى. دەگەنمەن, قازاقتىڭ قاسيەتتى قارا دومبىراسىنىڭ سيقىرلى دا سازدى ءۇنى ساعىنىش مۇڭىن ءبىر ساتكە بولسا دا سەيىلتە تۇسكەندەي اسەر قالدى.
جولامان بوشالاق,
اقتاۋ قالاسى.