ولەڭدەرىن ورىس تىلىندە جازاتىن بەلگىلى اقىن ءارى رەجيسسەر, قازاقستان رەسپۋبليكاسىنىڭ ەڭبەك سىڭىرگەن قايراتكەرى, قازاقستان جازۋشىلار جانە كينەماتوگرافيستەر وداعىنىڭ مۇشەسى باقىت قايىربەكوۆتىڭ “پۋت ۆودى” دەپ اتالاتىن جاڭا جيناعى وتكەن جىلى ماسكەۋدىڭ “تەزاۋرۋس” باسپاسىنان جارىق كورگەن بولاتىن. جاقىندا ماسكەۋدەگى قازاقستان ەلشىلىگىندە وسى كىتاپتىڭ تانىستىرىلۋ ءراسىمى بولىپ ءوتتى.
اقىن جيناعى ونىڭ ءار جىلدارى جازىلعان جىرلارىنان ءتۇزىلگەن. سونىمەن بىرگە, كىتاپقا جالپى رۋحانيات تۋرالى, زامانداستارىنىڭ شىعارمالارى جايىندا جازىلعان تىڭ ەسسەلەرى دە ەنگىزىلگەن ەكەن.
تۇساۋكەسەر راسىمىندە قازاقستاندىق عالىم, پروفەسسور ن.شايمەردەنوۆا, رەسەي حالىقتار دوستىعى ۋنيۆەرسيتەتىنىڭ ۇستازدارى, فيلولوگيا عىلىمدارىنىڭ دوكتورى ۆ.سينياچكين, فيلولوگيا عىلىمدارىنىڭ كانديداتى ە.كرەمەر, “تەزاۋرۋس” باسپاسىنىڭ باس ديرەكتورى ۆ.نوۆيتسكي, ازيا جانە افريكا ينستيتۋتىنىڭ پروفەسسورى, تاريح عىلىمدارىنىڭ دوكتورى ا.قادىرباەۆ, “قازاق ءتىلى” قوعامىنىڭ باسقارما مۇشەسى و.ايشاح, ادەبيەتشىلەر س.دميتريۋك, ك.تۇرىموۆا (دومبروۆسكايا) جانە باسقالار اقىن شىعارماشىلىعى ءجونىندە ءوز پىكىرلەرىن ءبىلدىردى.
اقىن باقىت قايىربەكوۆ بۇدان كەيىن ماسكەۋدىڭ “بيبليوگلوبۋس” كىتاپ دۇكەنىندە ءوتىپ تۇراتىن اۆتورلاردىڭ ءداستۇرلى كەزدەسۋى اياسىندا “پۋت ۆودى” جيناعىن باسقا دا وقىرماندارعا تانىستىردى.
سەرىكقالي بايمەنشە , “ەگەمەن قازاقستان” – ماسكەۋدەن.