سەمەيلىك جاس ورەن ءجانادىل تالدىباەۆ سپورتتا دا, ماتەماتيكادا دا قازاقستاننىڭ اتاق-داڭقىن شىعارىپ ءجۇر
دارىنىمەن دارالانعان جانادىل نەبارى 15 جاستا. ول كاراتەمەن شۇعىلدانعان جەتى جىلدا شىرقاۋ بيىكتەرگە كوتەرىلدى. ءبىر ءسۇيىنىشتىسى, ءجانادىل سپورتتا عانا ەمەس, فيزيكا-ماتەماتيكا ءپانىنىڭ قۇپياسىنا تەرەڭ بويلاپ, بۇل سالانى دا باعىندىرا باستادى. ەندەشە, جاس ورەننىڭ تولايىم تابىستارعا قالاي جەتكەنىنە ۇڭىلەيىكشى.
اكەسى امانجول سابيەۆ زايسان قالاسىنان اسكەري قىزمەت بابىمەن جارما اۋدانىنىڭ گەورگيەۆكا كەنتى ماڭىنداعى اسكەري قالاشىققا قونىس اۋدارعاندا ءجانادىل 1-سىنىپ تابالدىرىعىن اتتاعان ەدى. ەكىنشى سىنىپتى سەمەي قالاسىنداعى شاكارىم اتىنداعى №5 مەكتەپ-گيمنازيادا جالعاستىردى. جاسىنان سپورتقا بەيىمدىگىن بايقاعان اپايى جانەركە سۇيىكتى باۋىرى ءجانادىلدى قالانىڭ سول جاعالاۋىندا ورنالاسقان بولات تۇرلىقانوۆ اتىنداعى «جاستار» كەشەنىنىڭ ىشىندەگى «تسۋنامي» كاراتە مەكتەبىنە اپارىپ, كۇندەلىكتى جاتتىقتىرۋعا قاتىستىرادى. ونىڭ ديرەكتورى قارا بەلبەۋدەن ءىىى دان يەگەرى, ايگىلى سپورتشى ناتاليا كليمەنكو بولاتىن. مەن كىسى تانىسام, مىنا بالا ءالى تالاي رەت قازاقستاننىڭ اتىن الەمگە جاياتىن بولادى. تەك ۇنەمى, تۇراقتى تۇردە قاتىستىرىپ وتىرىڭدار, دەيدى ناتاليا كليمەنكو اپايى جانەركە امانجولقىزىنا.
ديرەكتوردىڭ ايتقانىنداي-اق, ءجانادىل 2004 جىلى رەسەيدىڭ رۋبتسوۆ قالاسىندا وتكەن حالىقارالىق جارىستا قازاقستان كومانداسى اتىنان قاتىسىپ, كۇمىس مەدال يەگەرى اتانىپ, ديپلوممەن ماراپاتتالادى. سول جىلى تاشكەنتتە وتكەن سايىستا ءوزبەكستان چەمپيونى اتانادى. سەمەيدە وتكەن ەۋرازيالىق چەمپيوناتتا قولا جۇلدەنى قانجىعاسىنا بايلادى. 2006 جىلى قاڭتار ايىندا جاسوسپىرىمدەر اراسىنداعى الەم چەمپيوناتىنا قاتىسۋعا امەريكاعا بارۋعا جولداما الادى. وندا وگايو شتاتىنىڭ كالامبۋس قالاسىندا وتكەن جارىستا ەكى دۇركىن الەم چەمپيونى اتاعىن جەڭىپ الدى. 2007 جىلى امەريكانىڭ لاس-ۆەگاس قالاسىندا وتكەن الەمدىك جارىسقا قازاقستان كومانداسى قۇراماسىندا قاتىسىپ, جارىستىڭ ەكى ءتۇرىنەن دە ەكىنشى ورىندى يەمدەنىپ, ەلگە جەڭىسپەن ورالدى. سول جىلى بىرىككەن اراب ءامىرلىكتەرىندە وتكەن جارىسقا ءتۇسىپ, الەم چەمپيونى اتاندى. سونىمەن جانادىل ءۇش دۇركىن الەم چەمپيونى, حالىقارالىق دارەجەدەگى سپورت شەبەرى.
جاقىندا ءجانادىلدى زايسانداعى اتا-اپاسى جەكەن جانە ءسابيرا كارىباەۆتاردىڭ ۇيىنە كەلگەن جەرىنەن جولىقتىردىق. الدىندا عانا سپورتتا دا, ماتەماتيكادا دا توپ جارىپ جۇرگەن دارىندى شاكىرتتى وبلىس اكىمى بەردىبەك ساپارباەۆ قابىلداپ, تابىسىمەن قۇتتىقتاپ, ماراپاتتاعان ەدى. وبلىس اكىمىنىڭ العىس حاتىن جەكەن مەن ءسابيرا كورسەتىپ تۇرىپ:
– بۇدان ءبىر اي بۇرىن جانادىلىمىز گرەكيادا وتكەن حالىقارالىق وليمپيادادا جۇلدەلى ورىنعا يە بولدى. ماتەماتيكادان توپ جارعان نەمەرەمىز قازاقستاننان بارعان وقۋشىلارعا اعىلشىن تىلىنەن ءتىلماش بولىپ, كوپ كومەك كورسەتىپتى. الداعى ۋاقىتتا دا ءجانادىل ءبىزدى قۋانتا بەرەدى دەگەن ويدامىز, – دەيدى جەكەن كارىباەۆ.
– شىركىن, كاراتە سپورتى وليمپيادا ويىندارىنىڭ باعدارلاماسىنا ەنسە, نۇر ۇستىنە نۇر بولار ەدى. بەلبەۋ كۇرەسىنە بەيىمى بار قازاق جاستارى كەتىپ جۇرگەن ەسەمىزدىڭ ورنىن تولتىرار ەدى, – دەيدى ءجانادىل.
نەسى بار, كەلەشەكتە كاراتەنىڭ وليمپيادا ويىندارىنىڭ باعدارلاماسىنا ەنىپ قالۋى عاجاپ ەمەس. سول كەزدە جانادىلدەي ورەندەرىمىز ەلىمىزدىڭ كوك تۋىن بيىكتە جەلبىرەتەتىنى ءسوزسىز.
وڭداسىن ەلۋباي, ماۋىتقازى زۇكەنوۆ, جۋرناليست.
شىعىس قازاقستان وبلىسى.
سۋرەتتە: ج. تالدىباەۆ اتاسىمەن جانە اپاسىمەن بىرگە.