12 ناۋرىز كۇنى قاليبەك قۋانىشباەۆ اتىنداعى قازاق مۋزىكالى دراما تەاترىنىڭ ساحناسىندا ارقالىق قالالىق قازاق جاسوسپىرىمدەر تەاترى تالعامى جوعارى استانالىق كورەرمەندەردىڭ نازارىنا تانىمال جازۋشى نەسىپبەك ايت ۇلىنىڭ «تىلەپ-سارىقىز» حيسساسىن ۇسىنباق.
10 جىل بويىنا كورەرمەن كوزايىمىنا اينالعان «ارقالىق قازاق جاسوسپىرىمدەر تەاترى» مكقك-ءنىڭ بۇل قويىلىمىنا ءجاسوسپىرىمدەر تەاترىنىڭ 20 ءارتىسى تارتىلعان. «تىلەپ-سارىقىز» حيسساسىنىڭ نەگىزگى وزەگى ماڭگىلىك جىر – ماحاببات.
«ارقالىق قازاق ءجاسوسپىرىمدەر تەاترى» مكقك-ءنىڭ بۇگىنگى تاڭدا رەپەرتۋارىندا 47 قويىلىم – 20 دراما, 9 كومەديا, 18 بالالارعا ارنالعان ەرتەگىسى بار. تەاتردىڭ باس ديرەكتورى, قر مادەنيەت قايراتكەرى وتاركۇل ورداباەۆا قازاقستاندا تۇڭعىش رەت قۇرىلعان فولكلورلى-ەتنوگرافيالىق «شەرتەر» ءانسامبلىنىڭ نەگىزىن قالاۋشىلاردىڭ ءبىرى. تەاتر ۇجىمى جىل سايىن كورەرمەندەر نازارىنا تىڭ جوبالار مەن قويىلىمدار ۇسىنىپ وتىر. بۇگىنگى تاڭدا جانات حادجيەۆ, ساعىزباي قارابالين, تاتيانا راحيشەۆا, عازيز ارىنوۆ سىندى تانىمال رەجيسسەرلەر ەڭبەك ەتۋدە. قوستاناي وبلىسىنىڭ ارقالىق قالاسىندا قونىس تەپكەن تەاتر ۇجىمىنىڭ قاتارىندا ءبولتىرىك مولداشەۆ, كۇلاي احمەتوۆا, رايا بايكوبەن, ەرحان باراقوۆ, ورازبەك نۇرعالي, باعنۇر مولداشەۆ سىندى تانىمال ونەر تارلاندارى بار. ساحنا الەمىنىڭ قۇدىرەتىن ەندى سەزە باستاعان تالانتتى جاستاردىڭ قاتارىندا الىبەك مانەتوۆ, باقىتكۇل ورداباەۆا, تالعات بەك, داۋرەن ورداباەۆ, نۇرلان بايشين ەسىمدەرىن ماقتانىشپەن ايتا الامىز.
تورعاي جۇرتى تەاتردى جاقسى كورەدى, كورەرمەننىڭ قويىلىمعا كەلۋى دە جامان ەمەس. رەسپۋبليكالىق تەاترلار فەستيۆالىنە ءجيى قاتىسىپ, ديپلومدارمەن, مادەنيەت مينيسترلىگىنىڭ العىس حاتتارىمەن ماراپاتتالعان تەاتر ۇجىمى استاناعا گاسترولدىك ساپارىنا جوعارى دەڭگەيدە دايىندالدى. تورعايلىق ونەر ۇجىمىن كۇتكەن استانالىقتار ءۇشىن بۇل جاعىمدى جاڭالىق بولىپ وتىر.
قۋانىشباي جۇماباي ۇلى.