«ەگەمەن قازاقستان» گازەتىنىڭ 2016 جىلعى 26 قازان, 205-ءشى سانىندا جارىق كورگەن بايدىبەك اۋدانىنىڭ تۇرعىنى مۇحتار تۇرداليەۆتىڭ كورگەن ءتۇسى تۋرالى جازىلعان «اڭىز بەن اقيقات» دەگەن ماقالاعا وراي ءوز پىكىرىمدى ءبىلدىرۋدى ءجون سانادىم. ءوزىم كەڭەس داۋىرىندە پارتيا-كەڭەس قىزمەتكەرى بولعان اداممىن. نەگىزگى كاسىبىم بولماسا دا, ولكە تاريحىن زەرتتەۋمەن اينالىسىپ, بىرنەشە كىتابىم جارىق كوردى.
ال ەندى مەنىڭ ايتايىن دەگەنىم, زايسان اۋدانى ۇلكەن قاراتال اۋىلىنىڭ تۋماسى كاكيقىزى كۇمىساي دەگەن بويجەتكەن الماتىدان تۋىستارىنا 1996 جىلى تەلەفون شالىپ, ءتۇس كورگەنىن ايتادى. تۇسىندە بەلگىسىز ادام كەلىپ: «مەن ءاز-جانىبەك حانمەن تەڭ بولعان اداممىن. بويىم 2 مەتر 35 سم. ءحVىى عاسىردا 49 جاستا جاۋ قولىنان قازا تاپتىم. ناماز وقىپ وتىرعاندا قىلىشپەن باسىمنىڭ جەلكە تۇسىنان شاپتى, سان عاسىر اياقاستى بولىپ, تاپتالىپ جاتىرمىن, ءمايىتىم سەنىڭ باباڭ نۇرپەيىستىڭ ءۇيىنىڭ تەرەزەسى الدىندا, 2 مەتر جەردە جاتىر. قازىپ الىپ قايتا جەرلەۋگە كومەكتەسۋىڭدى سۇرايمىن», دەپ جوق بولىپ كەتەدى.
كۇمىسايدىڭ تۋىستارى بۇل اڭگىمەگە ءمان بەرمەيدى. بەلگىسىز ادام اۋىق-اۋىق كۇمىسايدى مازالاي بەرسە كەرەك. بويجەتكەن ىزا بولىپ, ەگەر ايتقاندى ورىن-داماساڭدار سول جەردى ءوزىم بارىپ قازامىن دەگەننەن كەيىن اعالارى لاجسىز 1997 جىلى ايتىلعان مولشەرمەن جەردى قازعاندا شىنىندا دا وتە ءىرى ادامنىڭ سۇيەگى شىعادى. ولار سۇيەكتى جيناستىرىپ, ۇلكەن قاراتال اۋىلىنىڭ وڭتۇستىك جاعىنا جاڭا جەرگە قايتا جەرلەيدى. ول زيراتقا الىستان ارنايى كەلىپ, قۇران وقىتىپ ءجۇرگەندەر بار. سوندىقتان دا مۇحتار تۇرداليەۆ اقساقالدىڭ ەجەلگى وتىرار كىتاپحاناسى تۋرالى كورگەن تۇسىنە جەڭىل-جەلپى قاراۋعا بولمايتىن سياقتى. تابيعاتتا تىلسىم دۇنيە كوپ قوي. وتىراردىڭ باي كىتاپحاناسى تابىلسا, قازاق ەلى ءۇشىن قۇن جەتپەيتىن التىن قازىنا عوي.
قاليبەك التىباەۆ,
زايسان اۋدانىنىڭ قۇرمەتتى ازاماتى,
قازاقستان جۋرناليستەر وداعىنىڭ مۇشەسى
شىعىس قازاقستان وبلىسى