ەلورداداعى ورتالىق كوممۋنيكاتسيالار قىزمەتىندە وتكەن بريفينگتە مەملەكەت قايراتكەرى, فيلولوگيا عىلىمدارىنىڭ دوكتورى, پروفەسسور مىرزاتاي جولداسبەكوۆ كىتاپقا قاتىستى ويلارىن ءبىلدىردى.
«الماتىداعى قازگۋ-گە تۇسكەن سوڭ كىتاپقا شولدەپ كەلگەن بىزدەر سول كەزدەگى پۋشكين اتىنداعى كىتاپحاناعا اعىلاتىنبىز. كىتاپ سۇيەر جاستار ول كەزدە كىتاپحانادا تانىساتىن. ەڭبەك ەرى, داڭقتى اقىن اعالارىڭ ولجاس سۇلەيمەنوۆپەن مەن كىتاپحانادا تانىسقانمىن. مىنە, سودان بەرى قانشا جىلدار وتسە, دە ءبىر-بىرىمىزدەن ايرىلعانىمىز جوق. دوس, ءىنى-باۋىر بوپ ارالاسىپ كەلەمىز. ءبىز بارلىق ونەگەنى كىتاپتان الدىق»-دەدى مىرزاتاي جولداسبەكوۆ. ول وركەنيەتتى ەلدەردە تانىمال كىتاپحانالاردىڭ كوپشىلىگى جەكە كىتاپحانالاردان قۇرالعانىن ايتىپ, اتاقتى الەكساندريا كىتاپحاناسىن مىسال ەتتى.
بۇل ورايدا ول ءوزىنىڭ 9 جارىم مىڭنان اسا كىتابىن ۇلتتىق اكادەميالىق كىتاپحاناعا وتكىزگەنىن, قالامگەرلەر تاراپىنان وسىنداي قوزعالىستىڭ باستالعانىن ايتتى. قادىر مىرزاليەۆتىڭ جەكە كىتاپحاناسى ورالعا, قالتاي مۇحامەدجانوۆتىڭ جەكە كىتاپحاناسى قىزىلورداعا كەتكەنىن, سونداي-اق, جاقىن كۇندەردە ءابىش كەكىلباەۆتىڭ جەكە كىتاپحاناسى اقتاۋعا اتتاناتىنىن, سول جاقتا جازۋشىعا ارنالعان ۇلكەن ورتالىقتىڭ اشىلاتىنىن جەتكىزدى.
«مەن دۇنيە جيناعانىم جوق. كىتاپ جينادىم. الدىمىزداعى اعالارىمىزدىڭ بارلىعى كىتاپ ارقىلى ءوسىپ ءوندى»-دەگەن پروفەسسور قازىرگى قوعامعا قاراپ ۋايىمدايتىنىن, جاستاردىڭ, بالالاردىڭ قولىنان تەلەفون تۇسپەيتىنىن, ادامداردىڭ ءبىر-بىرىمەن سويلەسۋدەن قالىپ بارا جاتقانىن الدىعا تارتتى. شەشەن حالىقتىڭ ۇرپاعى تىلدەن قالا ما, ەكراننان شاشىرايتىن زياندى ساۋلەلەردىڭ سالدارىنان كوزدەن قالا ما دەپ ۋايىمدايتىنىن اشىق ايتتى.
ايگۇل سەيىلوۆا